Durante tratamento presupuesto, un ausencia cu sigur a hala hopi atencion tabata esun di e parlamentario di fraccion di AVP, mr. Gerlien Croes, cu lo ta den exterior.
Hopi tabata e criticanan cu el a ricibi, pa a asisti n’un fiesta di casamento, na un momento asina crucial pa nos pais. Pero e reaccion di Croes sigur no a tarda pa drenta, caminda cu, sin menciona nomber, el a contesta cu ta su shimis di color lo a haci hopi hende dolor. Riba esaki, Minister Maduro a indica cu Croes a bay chercha di pueblo. “E presupuesto ta e ley di mas importante di pais Aruba y pa bo trabou bo mester ta akinan. Pero pa bay di paranda cu bleki cerbes den man, ni ki shimis bo bisti, bo ta fout,” e mandatario a bisa. No tin cuestion di jaloezie.
El a reacciona tambe riba e echo cu e tambe a bay Corsou durante algun reunion importante. Pero segun e mandatario, e fiesta cu el a asisti tabata planea mucho mas prome cu e reunion a bin. Ta danki n’e trabou di ekipo, cu a brind’e e oportunidad, pa a yud’e pa e parti di e trabou.
Diferencia entre esun di Maduro cu di Croes, segun e mandatario, ta cu el a bay pa para testigo y no a bay pa bebe, yega bin wayaba parlamento. Y ta keda sin asisti n’e reunion di mas importante.
Por ultimo, Maduro a bisa, cu el a forma parti di Parlamento pa 8 aña largo y e tabata presenta na tur di nan. Esey ta algo cu hopi por siña di dje.
