Aruba ta logra un otro paso crucial den su desaroyo infrastructural y ta fortalece nos sector economico di turismo. Esey ta loke recientemente e Minister di Turismo, mr.Wendrick Cicilia hunto cu Prome Minister mr. Mike Eman por a confirma ora cu a bishita Aeropuerto Internacional Reina Beatrix pa un recorido oficial di fase 1A den e ambicioso proyecto Gateway 2030.
Anuncia den luna di mei 2017, durante Gabinete Eman II, Gateway 2030 ta un plan di expansion y modernisacion multi-facetico cu ta transforma e infrastructura di nos aeropuerto pa satisface e demanda di un turismo moderno, competitivo y sostenibel. Pa Aruba, cu ta depende grandemente di turismo, e proyecto aki ta un pilar esencial den nos vision pa prosperidad economico y progreso.
Terminal moderno cu autenticidad Arubiano
Fase 1A ta presenta un sala di check-in impresionante cu ta ofrece un experiencia unico pa nos bishitante desde e momento cu nan yega. Su diseño y arkitectura interno ta un homenahe na nos autenticidad y cultura, reforsando e identidad unico di Aruba na nivel global.
Minister Cicilia: “Aruba no ta solamente un destinacion turistico; nos ta un pueblo cu un historia y tradicion rico, y esaki ta refleha den e infrastructura modernisa di nos aeropuerto. Ademas, a eleva e proceso di baggage handling na un nivel internacional cu e ultimo tecnologia digitalisa. Esaki ta cumpli cu tur norma internacional y ta sigura un operacion eficiente y sigur, eliminando retraso y incomodidad pa pasahero.”
Innovacion y sostenibilidad: Un vision pa turismo di calidad
Pa e titular di turismo tabata hopi importante pa profundisa su mes mas ainda den e proyecto y papia personalmente cu e ehecutivonan di Aruba Airport Authority N.V. cu ta ehecutand’e. Na final, Minister Cicilia a gradici nan pa e recorido y splicacion, expresando su disposicion pa contribui na e exito di e fase aki y esunnan cu lo bin despues.
E fase nobo di Gateway 2030 ta djis un fraccion di un vision mas grandi: crea un experiencia turistico excepcional pa cada persona cu yega nos isla. Turismo pa Aruba ta mas cu beach y resort, pero un experiencia completo cu ta cuminsa desde e momento cu un bishitante pone pia riba nos isla. Un aeropuerto modernisa y eficiente ta esencial pa sigura cu esaki ta posibel.
