Sra. Camelia Römer, minister di Salú, Medio Ambiente i Naturalesa a organi á e promé kumbre pa un grupo basta grandi ku ta dediká nan mes na nos bienestar ambiental i naturalesa . E kumbre aki a kuminsá fo’i 8.30 te 12.00 di manera ku por a diskutí kon pa yega na plannan fiho pa Medio Ambiente i Naturalesa. Netamente den e siman di Medio Ambiente i Naturalesa sra. Römer a skohe pa sinta ku e gruponan ku ta defendé nos medio ambiente i naturalesa. E intenshon di e enkuentro ta pa yega na un sistema di konsulta strukturá pa por traha na mihó kalidat di nos Medio Ambiente i protekshon di Naturalesa. Komo resultado di e Kumbre a yega na palabrashon ku lo instalá un Konseho Koordinador,
bou kua ta kai diferente grupo di trabou ku lo atendé diferente tema manera: Maneho di awa; Maneho di sushi; Maneho kontra polushon di aire; Maneho di klima; i Maneho di naturalesa. Den tempu lo por añadí mas tema si e nesesidat surgí. Minister lo por konsultá i tambe risibí konseho pidi òf no pidi di e Konseho Koordinadó. Si minister no sigui un konseho lo e hasi esaki di forma motivá. E konsehonan lo keda publiká den kuadro di transparensia i un biaha den kada 4 luna minister lo sinta ku e aktornan konserní. Minister Camelia Römer ta sumamente satisfecho ku e manera ku e kumbre a bai i a gradisí tur e partisipantenan pa e trabou balioso ku nan ta hasi pa nos dushi Kòrsou. E ta spera ku nan lo keda mesun skèrpi i sigui vigilá ku kosnan ta kana bon. Na final e la indiká ku ta huntu nos por yega na un pais kaminda nos tur por biba felis.
