Djabièrne mainta, 5 di yanüari ultimó a reuní ku diferente stakeholders ku di un of otro forma ta kuida, stima i tin atenshon pa animalnan na Kòrsou. Durante e reunion aki a papia tokante e situashon aktual di animalnan riba nos isla.
Diferente punto a wòrdu toka, entre otro:
-mester bin mas lei pa protehá animalnan i pa promové nan bienestar;
-mester bin mas supervishon, kontròl riba kumplimentu di lei relashoná ku bienestar di animal.
-mester trese mas synergia entre organisashonnan ku ta traha pa bienestar di animalnan;
-kampaña di edukashon ta nesesario pa funkshonarionan relevante, pero tambe pa formashon di nos pueblo tokante medio ambiente i forma di atende ku animalnan;
-mester stimulá adoptashon di bestiannan di kas;
-ta importante pa bini ku un kliniká pa bestianan ku ta dualu riba kaya;
-mester bai duna atenshon na maneho i forma di atendé pa animalnan komersial na petshops.
Minister Suzy Camelia Römer i Minister Marilyn Alcalá-Wallé ta trahando di un forma integral pa un miho bienestar di nos animalnan. E situashon aktual di nos animalnan ta di lamentá. Tin hopi maltrato, tiki kuido i amor pa nos animalnan.
Gabinete Rhuggenaath ta bai trese un kambio den esaki. Re-edukashon di nos pueblo ta esensial pa trese kambio.
Edukashon ta fuente di sabidoria. Pa e motibu aki ta bai traha entre otro riba lèspakèt i weganan edukativo pa eduká i krea konsientisashon serka nos muchanan i hóbennan ku ta futuro di mañan.
A palabrá ku Ministerio di Enseñansa, Siensia, Kultura i Deporte ta inventarisá e informashon i trabou ku ya a wòrdu hasí dor di Dierenbescherming. Tambe ta enbolbí Fundashon Material pa Skol pa yega na un pakete total, kuminsando ku Enseñansa di Fundeshi.
Dentro di poko e plataforma ta reuní pa kontinuá ku e trajekto.
Riba potret por mira e reunion di e mainta frutifero.