Recientemente Ministerio di Deporte hunto cu Fundacion Lotto pa Deporte a organisa un evento na Kowloon Restaurant dedica specialmente na e 4 deportistanan cu recientemente a gana premio durante nan participacion den campeonato na Merca di Taekwondo. Nan tabata hunto cu nan famia, unda e mandatario a regala nan un faha conmemorativo di e pelea cu nan a participa na dje.
Minister di Salud Publico, Cuido di nos Grandinan y Deporte, dr. Carlos “Alex” Schwengle a gradici e hobennan pa nan participacion, disciplina y presentacion, hibando nomber di Aruba na nivel internaciona. Presidente di Fundacion Lotto pa Deporte, mr. Di-Stefano Wernet RA a sigura cu e club di Brazil Taekwondo Stichting ta un ehempel pa hopi otro, nan ta pidi subsidio, pero nan mes ta organisa evento y recauda fondo y ta masha transparente cu nan cifranan. Presidente di Aruba Taekwondo Bond, Guaicaipuro Jimenez a yama Gobierno y Fundacion Lotto pa Deporte danki pa e sosten di semper y pa e evento dedica na e deportistanan specifico aki.
E 4 atletanan ta Joshua Klaber (12 aña), Zahyon Klaber (16 aña), Jourdé Klaber (18 aña) y Danon Delamore (12 aña). Ta bon pa bisa cu na aña 2015 e team a biaha pa Korea cu 8 atleta y a bolbe Aruba cu 8 medaya, participando na e World Children Taekwondo Festival y na e Chuncheon Korean Open International Taekwondo Championship.
A funda Aruba Taekwondo Bond desde aña 1980. Awendia tin 10 club activo cu 450 practicante, di cual 200 atleta ta participa den campeonatonan local. Anualmente ta participa tambe den campeonatonan internacional, manera e “US Open”, “Copa de Presidentes” na Las Vegas. Tambe ta participa activamente den e calendario olimpico. Seleccion lo participa den e siguiente simannan na weganan hubenil Sur Americano na Chile. Lo participa e aña aki tambe den e “Costa Rica Open”. Aruba ta conta cu dos Grand Master, den persona di Chaco Cornelio y Marilu de Veer, ambos cu faha preto cu 7 dan.
