Minister Rudy Lampe kier busca hende di sector priva pa duna les na OAA

Juan Rasmijn docente di Openbare Avondleergangen Aruba (OAA) a duna di conoce cu e intencion di Minister di Enseñansa actual pa ta busca hende di sector priva of for di algun otro departamento pa bin duna un man y fungi como docente na OAA. Un situacion preocupante, segun Rasmijn, mirando cu no a tuma contacto cu e docentenan actual pa e aña escolar pero mas ainda pa pone hende den e posicion sin tin formacion pa fungi como tal.

Ponencia di e Minister ta cu e docentenan, cu gran mayoria ta traha den dia tambe, ta overwerk nan mes y no ta funciona bon den nan trabou. Rasmijn di su banda ta coregi e ponencia aki bisando cu e rooster di mayoria ta consisti di docentenan cu durante siman ta traha un of dos dia den henter e siman cual no lo afecta e trabou diario di den dia.

Juan Rasmijn ta conta cu e mes tin 35 aña eherciendo e trabou di docente di cual durante tur e periodo aki nunca a confronta ningun problema, semper a coopera cu su trabou, abierto semper na momento cu nan aserk’e pa sosten y/o conseho. No ta asina cu e ta traha tur dia den siman, ta papia di 2 lesuur of un biaha pa siman caminda pa mas di 65 aña a funciona sin ningun problema. Dicon diripiente e ta un problema awo?

Docentenan ta sigui demostra nan mal contento. Awe nan ta na palabra riba 24ora.com. Clink link pa mas https://24ora.tv/2nzy5wC#PromeDenNoticia

Posted by 24ora on Friday, October 11, 2019

Enseñansa ta costa placa pero tambe e PILAR di bo pais pero ta netamente riba enseñansa lo kier bin “bezuinig” (spaar) mencionando un suma di 28 miyon florin kitando asina e suma aki for di enseñansa. Lamentabel di scucha, mirando cu ta e Docentenan cu pa añas a guia tur e profesionalnan cu awe ta dirigi nos pais manera entre otro e Parlamentario, Minister, Dokter, Abogado cu esfuerso di e docentenan cu a dedica/ sacrifica nan mes na duna e miho di nan pa logra e miho educacion pa e pueblo aki.

Cu representacion di sindicato a bay reunion cu Prome Minister Evelyn Wever Croes como tambe Presidente di Parlamento Ady Thijsen y te dia di awe ta en espera di un contesta di ambos. Den reunion a vocifera claramente cu no tin ningun problema pa duna les, pero mas bien e cambio abrupto cu kier a introduci e cambio di un siman pa otro. Di su banda e Prome Minister a haci e pregunta si docentenan lo por biba cu un aña mas na e sistema actual caminda di su banda Rasmijn a comunica cu ta netamente locual nan a conseha. Duna e docentenan un pa dos aña di transicion pa asina prepara nan mes pa e cambio cu kier implementa pero structural, pasobra mientrastanto no tin nada planea pa introduci.

Studiantenan tin e incertidumbre awo si acaso esnan cu ta bay dune les cuminsando dialuna awo lo ta hendenan capacita y tambe si nan diploma lo tin valides na momento di finalisa esaki. Tur esaki ta preguntanan y preocupacion mirando cu no tin idea ta ken ta esnan cu lo bay ta encarga cu e lesnan di dialuna awo. Nan por ta pensionado, di sector priva of hende di otro departamento cu no tin titulo/experiencia como docente. Sin lubida cu Enseñansa pa Empleo ta encarga pa duna curso caminda ta ricibi un certificado mientras Docentenan di OAA ta duna Opleiding caminda bo ta ricibi un diploma cu ta un gran diferencia!

Algo cu Rasmijn a pone enfasis riba dje ta e hecho cu na varios ocacion durante reunion cu Minister di Enseñansa, e Minister ta yega su so, no ta bin cu ningun hende compañand’e na e reunionnan. No ta notula, no ta cana cu nada ni sikiera un pen pa apunta nada di kico a papia of no. Ta algo cu a strañe masha tanto y a hala su atencion mirando cu na mas di un biaha ta desmenti locual a keda palabra anteriormente door di e Minister y ta acusa esnan den reunion di a compronde malo locual el a bisa siendo cu na ningun momento e Minister a tuma nota di nada. Ta mira su actitud como uno iresponsabel poniendo enseñansa sangra te dia e muri. Ya e ta matando OAA si no haci algo na tempo pa salb’e pasobra e situacion ta birando cada biaha pio. Ta locual e la haci cu Traimerdia kita esnan capacita y reemplasanan cu hende cu no ta capacita pa duna les. Ta incomprendibel mirando tanto desaster tumando luga ta con Parlamento ta keda tolera e situacionnan aki continua.

Rasmijn ta indica cu nan a compronde cu a haya mas o menos 14 pa16 hende cu lo kier cuminsa duna les dialuna awo, contrario na e 50 pa 60 docentenan cu normalmente ta forma parti pa duna les den un aña escolar. Decision di NO tuma contacto cu Minister Lampe ta algo cu a keda palabra for di algun siman atras caba, e no ta tuma Docentenan na serio, faltando nan respet ehecutando lo contrario semper di locual palabra cu docentenan. Un Minister cu no ta tuma Enseñansa na serio no ta keda otro pa no tuma contacto cu ne y no lo bay den ningun combersacion cu su persona mas. Ta algo cu nan a informa e Prome Minister di Aruba tambe.

Den memoria ainda ta e palabranan di e Minister actual di Enseñansa caminda e la expresa su mes for di sla, bisando cu “ lo bin innovacion, lo bin cambio enz. y Docentenan cu no ta coopera of cu no kier bay den innovacion e lo delete nan” faltando respet na tur cu ta forma parti como docente den enseñansa. Bisando cu otro palabra, tur esunnan cu no kier coopera cu n’e, e lo delete nan y esaki no por ta un Minister di Enseñansa cu tin docentenan na pecho.