Minister Romero: No ta prohibi pa pisca den area di Parke Marino

485

Den luna di october 2019 Parke Arikok a ricibi e maneho pa cu Parke Nacional Arikok y Parke Marino, basa riba e ley di ROPV. Pero den pasado esaki a trace bastante confusion den nos piscadonan. Tabatin un pensamento robes cu piscadonan lo tin prohibicion di pisca of pasa den Parke Marino pa eherce nan ofishi, pero tambe cu lo tin limitacion pa pisca for di baranca den Parke Arikok.

Minister Chris Romero, encarga cu e Cartera di Sector Primario, a tene diferente combersacion cu gerencia di Parke Arikok y a trece dilanti e puntonan di preocupacion pa cu e piscadonan, pa asina trece claridad finalmente.

Ta asina cu, manera a menciona anteriormente, na october 2019 Parke Arikok a ricibi e maneho di e Parke Marino conforme ROPV. Den e prome fase lo ta pa trece tur piscado (stakeholders) hunto y sinta na mesa cu nan. E siguiente fase lo ta pa acumula tur informacion di stakeholders pa asina duna contenido na e plan di maneho di Parke Marino.

Tanten cu tur tramite pa haci e cambionan menciona ta andando, tur piscado por drenta Parke Arikok libremente pa pisca den e area di Parke Marino, sea for di boto of baranca.