Minister Romero a sali cu urgencia pa Colombia

12

Apenas cu Minister Chris Romero a yega recientemente for di un biahe di trabou, awe el a subi avion atrobe, rumbo pa Colombia. E mandatario a sali cu urgencia awe pa Bogota y cu conexion pa Bucaramanga. Ey e lo topa cu su tata, cu ta ricibiendo cuido specialisa den Hospital, relaciona cu retonan di salud, specificamente cu su curason.

Bucaramanga ta e capital y e ciudad mas grandi di e departamento “Santander” di Colombia. E tin e di 5 economia mas grandi di Colombia, tin e GDP di mas halto di Colombia, tin e porcentage di desempleo mas abou di henter Colombia y ta e di 9 ciudad cu ms populacion den Colombia, pa un total di 521.857 habitante. Como cu tin mas di 160 park tur rond di e ciudad, a dun’e e nomber di “La Ciudad de Los Parques” of tambe “La Ciudad Bonita de Colombia”.

Separa di hopi hospitalnan specialisa na Bucaramanga, tambe e ciudad ta e base pa e Instituto Petrolera Colombiana, conoci pa haci investigacionnan pa e compania nacional di petroleo di Colombia, Ecopetrol.

Chris Romero ta un di e Ministernan cu a biaha mas den e periodo di casi 2 aña sinta den e funcion di Minister di Transporte, Comunicacion y Sector Primario. Siendo un docente di scol, Romero a subi lista di MEP na aña 2005 y a logra 314 voto riba su nomber. Den eleccion di 2009 el a redobla su votonan te cu 622 voto. Den eleccion di aña 2013 e tabata number 2 riba lista y a haña 1273 voto. A bah’e na number 3 den e ultimo eleccion na 2017 y a baha den voto tambe na 1048. E ta un di e unico candidatonan riba lista di MEP cu a baha den e ultimo eleccion.