Minister Raymond Knops: Tuma medida ta necesario

1473

Dialuna a tuma luga un conferencia di prensa na VNO, den cuadro di e bishita di un dia di Minister Raymond Knops di Asuntonan di Interior y Asuntonan di Reino.

Den un declaracion breve e mandatario a duna un splicacion di su bishita caminda cu el a pasa varios sitio y a tene varios reunion. Parti mainta el a pasa cerca Gobernador, pa asina repasa riba loke ta pasando den y rond di Aruba.

Aki a pasa riba e situacion di finansas, tambe riba Venezuela, cooperacion dentro di Reino. Riba e mesun temanan, a papia cu prome minister. A papia tambe riba e relacion entre Hulanda y Aruba, y riba e manera con nan ta traha cu otro.

Minister Raymond Knops dunando relato di su bishita

Posted by 24ora on Monday, January 13, 2020

E minister a duna di conoce cu e ta basta satisfecho con esaki ta bayendo. E relacion aki ta bon y e retonan pa Aruba ta grandi, riba e bista financiero, y ta un caminda tin, ta pa sali p’adilanti.

Tuma e medidanan necesario y pa den futuro tin un economia creciente. Esey ta nifica mas trabao y tambe mas ingreso pa e gobierno pa asina cubri costonan.

Despues di esey el a bay Fundacion Pa Hende Muhe den Dificultad. E minister a comenta cu e organisacion aki ta wordo sosteni cu medionan den cuadro di e voorjaarsnota, riba tur loke tin di haber cu opvang. Den e caso aki cu esnan cu ta victima di violencia domestico, trafico di hende.

Knops tabata bao di e impresion di e manera con e profesionalnan ta traha con nan ta atende cu violencia domestico, cu ainda ta wordo considera como tabu. Knops ta contento cu atrabes di e contribucion di Hulanda, por expande e capacidad di estadia.

E tin confiansa riba esnan cu ta traha den e fundacion aki.

Fuera di esey, el a bishita varios monumento. Monumentonan cu ta di suma importancia pa Aruba. Aruba por ta orguyoso riba e conservacion di herencianan cultural, cu ta forma parti di historia y ta wordo lubida masha rapido mes y cu e documentacion ta bay perdi.

Tambe a bishita ImSan. Tambe e tabata tin e impresion riba e papel cu e instituto, door di traha hunto cu Baptist Center na Merca pa bin cu specialidad cu por trata mas hende aki y cu no mester bula bay Colombia. Esey claro ta cay riba e costonan. Cu esey por crea oportunidad pa islanan den region di Reino, haya oportunidad pa por trata pashent di nos islanan ruman.

Esaki tabata entre otro algun di e temanan cu Minister Knops a trece p’adilanti den e rueda di prensa cu a tuma luga dialuna merdia.