Minister Presidente ta pidi pa tur trahado di compania estatal entrega 12.6% di nan salario

1867

Prome minister di Aruba, Evelyn Wever-Croes, ta haci un apelacion un biaha mas, na tur trahado di companianan estatal y institutonan di gobierno, cu ta eherce un trabao publico, Institutonan manera Banco Central, FCCA, Pensioenfonds di Aruba, companianan manera WEB, Elmar, SETAR, RDA, Arubus, Post NV, tur e companianan pa duna di nan parti y mustra solidaridad y entrega 12.6% di salario te ora cu por mira cu berdad ta saliendo afo di e crisis.

E pandemia aki no a bin cu manual ni fecha di vencimento. Loke cu sa ta cu tin 11.650 mama y tata di famia cu a perde nan trabao den COVID y cu gobierno mester yuda nan pa asina nan por yega na 950 pa luna, e mandatario a expresa.

Inkietud y mal contento

Por a tuma nota den e ultimo dianan aki di un inkietud y mal contento cu ta reina bao di un grupo di empleado cu ta traha den sector semi publico. Aki ta referi na companianan estatal manera WEB, Elmar, Arubus, companianan estatal, cual ta companianan di Gobierno di cual algun Gobierno ta subsidia y otronan cu ta duna Gobierno dividendo.

E pandemia di COVID a dal Aruba hopi duro. Aña pasa ora cu e prome casonan a keda detecta, mester a cera fronteranan y cu esey 80% di entradanan di Gobierno a cay. Na mes momento mester a bay busca sosten. 

E unico caminda cu a haya sosten ta cerca Hulanda, pa presta e placa cu tin mester pa por sobrevivi y pa por yuda famianan sobrevivi e pandemia.

Ademas e prestamonan aki tabata na 0%. Pero nan no a bin sin condicion. Un condicion firme di Hulanda tabata, cu tur empleado, tanto publico como semi-publico, ta entrega 12.6% di nan salario pa asina mustra solidarismo.

Esaki tabata un condicion duro cu Hulanda a pone riba mesa, y cu mester a “take it or leave it” y si no a tum’e, no a haya e placa cu tabata tin mester pa por a sobrevivi aña pasa.

A acepta e condicion aki y a cuminsa na haci un apelacion na e trahadonan publico, ambtenaar y contratistanan di Gobierno y nan a entrega 12.6% di nan salario.

Tambe a pidi pensionadonan pa nan entrega 12.6% di nan pensioen. Y politiconan, minister y parlamentarionan pa entrega 25% di nan salario. E siguiente paso, basa riba e condicion di Hulanda, tabata pa pidi empleadonan di sector semi-publico tambe pa entrega a base di solidarismo y ademas a pidi nan pa e placa cu nan corta di nan trahadonan, pa nan pas’e pa un fondo special di FASE pa yuda Gobierno cubri e fondo di FASE.

Pa FASE Hulanda no a presta. Ta un placa cu Gobierno mes mester a percura p’e. Danki na e contribucion aki di e gran mayoria di trahado di sector semi-publico y publico, por a yuda 11.650 mama y tata di famia cu a perde tur cos, pa motibo di COVID. Cu a perde full nan trabao y entrada. Hendenan cu perde nan trabao a rais di COVID por bin na remarca pa FASE.

E ta un tipo di bijstand di 950 florin. 

A haci un apelacion riba empleadonan di sector semi-publico, di companianan Estatal y di tur a haci un apelacion pa entrega 12.6% di nan salario y yuda Gobierno yuda 11.650 mama y tata nan famia pa nan por haya tur luna 950 florin pa por cubri sikier algun di nan gastonan. 

FASE a costa Gobierno di Aruba 42.8 miyon florin. Placa cu a saca for di e propio presupuesto, cortando tur otro caminda cu por a corta y danki tambe na e contribucion di esnan cu ta traha den sector semi-publico, a logra haci esaki.

Unda ta para awo den januari 2021

E pandemia no a bay ningun caminda. Es mas, ta preparando hasta awor aki na comienso di un di tres ola. Ta mirando tambe cu e virus a cuminsa cambia di variante. Tin variante di Inglatera, tin variante di Brasil. Tin varios variante y ta trece retonan cu ne. Cu no por bisa ki dia e efectonan di e pandemia ta pasa.

No tin un bista exacto como un pais chikito ki dia ta haya e vacunanan tampoco. Esey ta pasobra paisnan grandi ta bayendo cu tur e vacunanan cu tin y Aruba cu tin cu haya atrabes di Hulanda, no ta hayando siguridad ki dia ni cuanto ta haya e vacunanan aki.

Mientras tanto ta memey di e pandemia. Ainda tin 11.650 hende cu tur luna ta bati na porta di gobierno pa haya FASE. Y ainda tin mas hende cu lo perde trabao den e lunanan nos dilanti. Pasobra simplemente e companianan no por wanta e golpi nan mas.

Ta pa e motibo aki mes, e mandatario ta haci un apelacion na e companianan semi-estatal pa duna un man y coopera cu 12.6% di nan salario pa asina yuda e ciudadanonan aki cu a perde nan trabao den e pandemia y e otronan cu posiblemente tin e chens di perde nan trabao, cubri un parti di nan entrada pa luna.