Recientemente Algemene Rekenkamer (ARA) a saca un rapport riba FASE, cua tabata entrega na parlamento pa wak ki paso lo bay tuma relaciona cu esaki. Segun e rapport aki, e otrogamento di FASE a conoce varios deficiencia. Ta trata aki di algun preocupacion relaciona cu a trata caso similar di forma igual como tambe di caso den cua ciudadano a haci peticion pa ricibi e ayudo di FASE y no a ricibi esaki y no por haci apelacion oficial.
Fuera di esaki tampoco tabatin un forma pa garantisa un prevencion di mal uzo di e ayudo aki, pues cu e ciudadanonan ricibi mas placa di locual ta stipula, por ehempel. Pues, no tabatin suficiente garantia cu a uza e fondonan publico di manera economico.
Segun minister presidente mr. Evelyn Wever-Croes a splica, actualmente ta ex-minister di asunto social, Glembert Croes, ta esun cu ta trahando riba un reaccion riba e rapport aki. Locual si por tuma nota di dje, segun Wever-Croes, ta cu den e rapport ARA a señala na cu gobierno a tuma accion hopi lihe cu e ayudo financiero aki y esaki tabata algo sumamente necesario.
No obstante, e conclusion mas cardinal di ARA ta cu no tabatin ley na luga pa esaki y berdad e tempo ey no lo a logra, pero aworaki ya ta dos aña despues y ainda no tin un ley na luga. Wever-Croes a bisa cu nan ta tuma e critica hopi na serio y ta pa es motibo ta trahando rib’e ley, cu nan a inicia aña pasa, pero a keda pega na varios ocasion. Ta premira cu pa fin di e luna aki lo culmina e proceso aki. El a enfatisa cu e proceso di traha un ley ta tarda, pero sigur e no ta di acuerdo cu door cu no tin ley ta habri porta pa cosnan cuestionabel tuma luga.
Pa un relato mas amplio, lesa edicion di TREMPAN.
