Despues cu tabatin masha lobbymento ayera den Parlamento pa sostene e mocion presenta pa Ricardo Croes di RED, relaciona cu e asunto di Cannabis Medicinal, hopi a pensa cu dor di no vota pe, cu esey automaticamente ta traduci den un crisis den coalicion. “Prome y despues di e reunion publico di ayeranochi mi a sigura Ricardo Croes cu nos lo bay acelera e investigacion relaciona cu legalisacion di cannabis medicinal”, asina Minister Presidente Wever-Croes a bisa awe mainta.

E lider di MEP y alabes lider di e gabinete aki a acentua cu tur tres partido den coalicion, esta MEP, RED y POR a bay campaña cu e punto aki y a haya sosten di votadonan. Es mas, e asunto aki ta inclui den nan acuerdo di gobernacion y den e programa di gobernacion di e Gobierno nobo. Pues no tin duda cu lo legalisa e uzo medicinal di cannabis.

Pero, tin un comision cu ta studiando e efectonan riba mas area. Por ehempel riba for di un punto di sector primario, pues si lo cultive na Aruba mes, si esey lo ta factibel. Tambe e sector economico ta investigando ki efecto economico e cultivo y benta di e remedi aki lo tin pa nos economia. Y sin lubida Minister di Husticia cu ta revisando e leynan existente cu mester cambia pa por legalisa e uzo. Den esaki ta tuma otro paisnan como ehempel, pa mira con nan a atende cu e cambionan eynan.

Pa loke ta e votacion, e Prome Minister e indica cu e no por dicidi pa e Parlamentarionan con nan ta vota pa leynan, mocionnan y amiendanan. Mester puntra cada Parlamentario individual dicon nan a sostene of no sostene e mocion aki. Pero como Gobierno e por bisa si cu e cambionan lo bini y awe mainta caba el a instrui e coordinador cu ta na cabes di e comision pa acelera e proceso aki.

Pero, ta sinti cu den comunidad tin un apuro pa e ley. No necesariamente for di esunnan cu ta malo y cu kisas tin cancer y mester alivia nan dolor, sino di e humadonan di Marihuana cu mas bien ta purba uza e legalisacion medicinal como un oportunidad pa tiki tiki atende legalisacion di e uzo recreacional. Con lo distingui e dosnan aki? “Esey ta eigenlijk e motibo pakico nos ta tumando nos tempo den e comision pa haci e trabou bon. Ami ta un hende cu ta kere cu sopi pura ta sali salo. Esaki ta un tema hopi delicado y nos no kier pa e bin cu su controversianan. Y pesey ta importante pa nos regle bon, garantisa cu e ta pa uzo medicinal. Lo yega na un lista di cua remedinan ta deriva di Cannabis y cua ta wordo acepta pa uza na Aruba como remedi. E lista ey so lo wordo permiti pa uzo medicinal di Cannabis. Bo dokter mester prescribi Bo y Bo ta bay botica y cumpre. Pero e lo wordo regula mas miho posibel”, asina Minister Presidente Evelyn Wever-Croes a finalisa bisando.

Comments

comments