Crisis Team di Gobierno di Aruba, encabesa pa Minister Presidente mr. Evelyn Wever-Croes a caba di anuncia awe diadomingo cu ta prolonga e medidanan impone te cu diahuebs awor dia 7 di januari 2021.
Gobierno ta considera con e virus ta plamando cu un “positivity rate” demasiado halto, cu cantidad di testnan den ultimo dianan cu tawata hopi abou y awor por tuma nota cu e cantidad di testnan a aumenta, sinembargo esaki, combina cu e positivity rate halto, ta pone cu ta prolonga e medidanan. Pues ta extende e Toque de Queda cu 4 dia mas; dianan 4, 5, 6 y 7 di Januari 2021.
Minister Presidente ta urgi comunidad di Aruba pa tuma nota di extension di fechanan di Toque de Queda cual ta di 11or di anochi pa 5 or di mainta riba cada un di e dianan cu a keda anuncia. E orario di ciere ta keda 10:00pm.
Crisis Team lo sigui monitorea e desaroyo di e pandemia di cerca pa tuma e pasonan necesario na tempo, asina e relato di Gobierno a termina bisando.
