Minister President ta nenga cu lo kita 1200 florin di pensionadonan

Durante tratamento di e ley pa adapta BBO-BAZV, Minister President Evelyn Wever-Croes a nenga cu pensionadonan cu un entrada mas halto cu e pensioen di AOV, esta mas halto cu 1107 florin pa luna, lo perde nan reparatietoeslag di 100 florin pa luna sumando asina 1200 florin pa aña. E Prome Mandatario a nenga tambe cu SVB lo keda cu e reduccion di e prima di AZV di 4% riba e pensioen di AOV.

E debate a surgi na momento cu Parlamentario Marlon Sneek a puntra e Prome Mandatario pa confirma cu pensionadonan lo perde nan reparatietoeslag manera cu nan tin un entrada cu ta mas halto cu 1107 florin pa luna. E prome Mandatario a contesta cu esaki no ta e caso y a referi na e tabel di reparatietoeslag cu ta conta pa tur esunnan cu ta trahando. E tabel aki ta indica un “gliding scale” di reparatietoeslag cu ta termina pa esunnan cu tin un entrada di 2500 florin pa luna.

Cu e declaracionnan aki e Prome Mandatario ta contradeci e ley di crisisheffing mes cu ta indica cu entrante prome di januari 2019, e reparatietoeslag pa pensionado lo conta solamente pa esunnan cu nan entrada  no ta mas halto cu 1107 florin pa luna. E parti splicatorio di e ley (memorie van toelichting) ta indica lo siguiente: “de inkomensgrens wordt gesteld op het bedrag, bedoeld in artikel 7, eerste lid, van de Landsverordening algemene ouderdomsverzekering (thans Afl. 1.107,-), het AOV-pensioen van een alleenstaande. Voor degenen die in totaal (pensioenuitkering en inkomen) meer dan het bedrag, bedoeld in artikel 7, eerste lid hebben, geld dat zij per 1 januari 2019 geen recht meer zullen hebben op een reparatietoeslag.”

Lo bira interesante con e ley aki lo wordo interpreta door di e organo cu ta encarga cu ehecucion di e ley aki, esta SVB. Nos redaccion lo acerca e organo pa un splicacion riba e pago di reparatietoeslag como tambe e reduccion di e prima di AZV. Ya cu riba e ultimo aki tambe a surgi un contradiccion entre declaracionnan di Parlamentario Marlon Sneek, Minister President Evelyn Wever Croes como tambe Minister di Finanzas Xiomara Ruix Maduro.

E pregunta ta si e reduccion di e prima di AZV pa esnan cu ta cobra AOV lo bay pa e fondo of pa e pensionado. Ya cu te awor ta e fondo di pensioen AOV, maneha pa SVB, ta esun cu ta paga e prima completo di AZV pa tur pensionado cu ta ricibi e suma di AOV.