Ayera mainta a tuma luga e ultimo reunion di Conseho di Minister cu participacion di Minister Otmar Oduber. “Sin duda, pa coleganan di Gabinete Wever-Croes, esaki tawata un momento di emocion”, asina un comunicado di Gobierno ta duna di conoce. Na september ultimo Minister Oduber a anuncia su retiro di politica.
Mester menciona cu, aunke Gobierno a anuncia mesora cu Marisol Lopez-Tromp lo tuma e encargo di Ministerio di Infrastructura y Medio Ambiente, cu ainda no tin claridad cu si e actual Parlamentario ta Ministeriabel of no. Fuentenan ta menciona cu keto bay no por logra haya un conseho positivo for di e instancianan, Ministerio Publico, Departamento di Siguridad Nacional y Departamento di Impuesto. Te ainda no ta conoci cua di nan tin e nombracion secuestra.
Den e matutino Awe Mainta a sali publica awe cu parce ta debe cu e futuro Minister y/of su casa tin habri. No ta menciona debe na unda.
Den caso cu no logra surpasa e retonan financiero, lo mester apunta un otro persona pa e funcion di Minister. E asunto aki lo por tin hasta repercucion den Partido MEP mes, pasobra por lo menos un candidato a keda sin bira Minister na 2017 pa e mesun motibo aki. Pues lo ta casi imposibel regla e asunto pa un candidato di POR ta ministeriabel siendo cu di MEP si a laga cay y di cual e mester a acepta funcion di Parlamentario mes.
Den e ultimo Conseho di Minister, Prome Minister Wever a gradici Minister Otmar pa su trabou y logronan durante e dos aña como Minister encarga cu Infrastructura y Medio Ambiente. Na e ocacion tambe a entrega Minister Otmar un bunita cuadra cu potret di Ministernan pa asina Minister Otmar tin un bunita recuerdo colga den su hogar di e dos aña cu a enfoca hunto cu tur Minister di Gabinete Wever-Croes riba e union pa traha hunto pa nos pueblo y logra cosnan grandi.
