Minister Otmar Oduber no a logra pasa ley di Serlimar awe

No obstante cu a haci tur sorto di intento, poniendo presion enorme riba e coalicion di MEP-POR-RED, toch Minister Otmar Oduber no a logra pasa su cambionan den ley di Serlimar awe. No solamente pasobra e tempo a bay laga nan, pero tambe pasobra el a haya mensahe cla for di diferente Parlamentario di MEP y hasta di RED, cu manera e ley ta hinca den otro awo, e NO lo conta cu nan sosten. Un di e condicionnan ta cu mester saca henter e asunto di Incinerator afo, pero tin mas!

Minister Otmar Oduber a purba tur forma durante e reunion pa convence e Parlamentarionan cu ta sostene e coalicion, cu e lo adapta e ley. Diripiente e mes a ripara cu el a bay mucho leu den su ley, por ehempel cu empleadonan di Serlimar por drenta companianan pa revisa nan administracion pa mira dicon nan no ta paga pa recoge sushi. Tabatin algun punto mas cu el a bisa den e reunion publico cu e lo ta dispuesto pa “laga cay” for di e ley cu su hurista a prepara pe. 

Aunke Prome Minister Evelyn Wever-Croes no tin nada di haber cu e ley aki, e tabata den Parlamento pa varios ora pa sostene su colega. Tabata cla pa tur hende cu na algun ocasion, e coalicion a pasa dor di bastante turbulencia, mustrando claramente cu Gobierno no tin control ni dominio total di e Parlamentarionan. Lo mester probecha e dos simannan di vakantie awo pa sigui purba convence tur 12 Parlamentario di coalicion pa sostene e ley aki. Chens ta grandi cu coalicion lo hay’e ta pasa ley di Cannabis prome cu RED por sostene e cambio aki proponi pa POR.

Na final, ora a bira 10:00pm, e caba cu e prome rond di preguntanan di Parlamentarionan y contesta di e Minister. Na e momento ey, Presidente mr. Juan “Ady” Thijsen a tuma e decision cu ta basta pa awe y a pospone e reunion pa aki dos siman, dia 15 di october pa 9:00am. 

Despues di dirigi e reunion pa mas cu 12 ora largo, tabata obvio pa tur den Parlamento cu Presidente mr. Ady Thijsen tabata cansa y rato rato tabata “bay den su mes”. Na algun ocasion Parlamenarionan tabata bis’e “pone atencion Voorzitter”.

Ta tene cuenta cu tin Parlamentarionan, manera Tjon, cu tin biahe priva pa haci mayan. Esey a haci cu a dicidi di pospone e reunion importante pa regla e asunto di e ley di CAft tambe pa un otro fecha, cu ainda nan no a menciona. Pues enbes di baha cu reces diabierna, Parlamento a dicidi di tuma “un dia extra” di vakantie y a cera tur reunion awe diaranson anochi caba. 

Noticia relacionaMas for di e autor