Minister Otmar Oduber: Mi ta retira pa mi salud y mi famia

Manera cu tabata di spera, e anuncio cu Gobierno a haci diamars mainta durante un conferencia di prensa tabata relaciona cu e retiro di Otmar Oduber como Minister den Gabinete Wever Croes. E mandatario, kende lo keda te cu 12 di december awo, a splica cu esaki ta debi na entre otro su estado di salud, pero a sigura cu e no t’asina serio cu e ta bay muri. Pero si ta yega dado momento e curpa ta manda señal cu mester cuminsa “slow down”.

Despues di mas cu 20 aña den politica, el a bisa, ta momento prome cu e bira un Dinosaurio, el a dicidi di baha.  “…. cu un curason yena di emocion, expectativa y ilusionnan nobo awe ma anuncia publicamente e decision (no facil by the way) di inicia un etapa nobo den bida.

Marisol Lopez-Tromp  di 49 aña di edad a ocupa e puestonan di Presidente di Parlamento di Aruba, Minister di Infrastuctura, Social y Enseñansa y alabes Vice Minister Presidente. El a bira un miembro independiente den Parlamento despues di a sak’e for di Partido MEP na 2010. Na aña 2013 el a uni na Partido Arubaanse Volkspartij (AVP) y na 2017 a participa den eleccion cu Partido ‘Pueblo Orguyoso y Respeta” (POR). Su record di mas voto tabata 4709 na aña 2001 y di menos tabata 497 den ultimo eleccion na aña 2017.

“Despues di ta den politica activo pa 22 aña consecutivo dedicando mi bida na lucha pa un miho bienestar pa nos pida baranca y nos hendenan, awe ma anuncia cu mi ta retira for di politica activo na december di e aña aki”, asina Minister Otmar Oduber a bisa awe mainta durante su conferencia di prensa, den presencia di tur 8 Minister, su Fraccion den Parlamento y Lider di Fraccion di RED den Parlamento como partnernan di coalicion Weever-Croes.

Otmar Oduber ta anuncia su retiro y entrada di Marisol Tromp como Minister

Posted by 24ora on Tuesday, September 17, 2019

A scoge e fecha aki mirando cu ta na december, 22 aña pasa, a entrega lista unda pa prome biaha mi tabata un candidato politico. Como tal, ta un bon dia pa baha e trapi di Bestuurskantoor ultimo biaha no solamente como Minister, pero tambe como politico activo. Motibonan pa e retiro ta estrictamente personal. Despues di tanto aña a yega ora pa dedica na mi famia y t’ey 100% pa nan.”

Minister Otmar Oduber hunto cu su señora durante evento di Trash by Ronchi den fin di siman.

E mes a anuncia cu esun cu ta bay reemplas’e ta Marisol Lopez Tromp. E siguiente pa drenta Parlamento lo ta mr. Jocelin Croes, kende ta Minister Plenipotenciario di Aruba na Washington. A delibera cun’e y a haci un apelacion na dje pa keda Washington “unda e ta haciendo un bon trabou y el a bay di acuerdo,” Oduber a bisa prensa. Esaki ta nifica cu e siguiente candidato di POR pa drenta Parlamento ta no. 6 Dellanire Yecenia Maduro, kende a haya 160 voto den su prome presentacion den arena politico.

Dellanire Maduro a logra 160 voto den e ultimo eleccion. E tabata candidato number 6 riba lista di Partido POR.

Liderazgo lo no ta un problema, segun Oduber, ya cu for di momento cu a lanta e plataforma aki, el a bin ta guiando esaki hunto cu candidato # 2, esta Minister Andin Bikker. Aunke el a sigura cu apesar di su anuncio cu e ta retira di politica activo, semper e lo keda duna ayudo na POR. “Cu mi no lo ta politico activo mas no lo kiermen cu mi lo bandona politica, esey ta den mi sanger y lo mi keda sostene mi partido POR y nos Gobierno, lo mi sigui traha, na un otro manera, pa mi hendenan y cu mi isla semper den mente y curason.”