Minister Otmar Oduber cu atencion na problema di maneho di desperdicio

Dialuna mainta Minister di Infrastructura y Medio Ambiente sr. Otmar Oduber a reuni cu un grupo grandi di profesionalnan di diferente departamento. Minister a anunica dos comision, uno cu tin e tarea pa bin cu proposicionnan pa soluciona e problema di dump y un otro pa soluciona con nos ta maneha desperdicio/sushi aki na Aruba.

“Durante di reunion, a palabra cu hunto lo mester yega na un conclusion di ki caminda mester wordo encamina pa yega na solucion a corto, medio y largo plaso pa loke ta maneho di sushi akinan na Aruba,”Minister Oduber a bisa. Segun director di DOW Marlon Croes elabora, dentro di 45 dia e prome grupo lo mester bin cu proposicionnan di con por bay cera dump a termino cortico y a termino medio pa evita cu e problema di dump ta bira mas grandi. E di dos grupo tambe tin 45 dia adicional pa por pensa con ta bay soluciona e problemanan aki na un manera mas structural y permanente a termino largo. Segun sr. Croes, e comisionnan tin retonan grandi pa atende cu ne. Esaki kiermen cu den 90 dia e comisionnan lo mester tin e solucion cu lo bay wordo implementa aki dos aña. DOW ta forma parti di ambos comision, den cual nan ta duna support tecnico na e grupo pa loke ta e parti legislativo, ambiental y salubridad. ATIA tambe ta forma parti di e comision aki como representante di dunadonan di trabou. ‘dentro di e comision aki nos ta bay atende cu e problematica di con nos ta bay atende cu nos  desperdicio, y Minister a pone algun parametro basta strak riba dje y cu den un tempo defini, Minister lo desea pa tin rapportnan y solucionnan pa nos problematica di sushi aki na Aruba. Como comercio naturalmente nos tin e obligacion di contribui na e proceso aki.

Comercio tambe ta un partido cu ta maneha bastante desperdicio na e Isla. Kiermen, nos tin e deber social, pero tambe e deber moral di contribui na soluciona un problema cu ta basta serio, sr. Ronald van Trigt presidente di ATIA a splica. Segun Wilmer Salazar di Departamento di Salubridad Publico ta splica, E rol di salubridad publico ta pa evalua e situacion di tur dump cu tin, tur e efectonan negativo cu tin pa e salud di hende y con nos por duna conseho pa evita e problema aki por ta negativo pa salud di hende. Concluyendo, Minister Oduber a bisa cu tur miembro a acepta e reto caminda cu lo bay tin e comision cu lo duna conseho na Gobierno, sinembargo cu ne tambe lo acerca TNO pa prepara un Terms of Reference (TOR) pa habri oportunidad Local y Internacional pa nan por bin cu ideanan y sugerencianan di con por soluciona e problema di dump aki na Aruba. No solamente di Parkietenbos, pero tambe di con lo trata desperdicio den futuro.’