Awe mainta Minister di turismo, salud y deporte, Dangui Oduber, a splica riba henter e situacion di e vacunanan cu tin riba mercado y kico Aruba por spera. Prome cu aña a cera, gobierno a tene un vierlanden overleg pa discuti e tema di vacuna. Un tema sigur cu mundo henter tawata en espera di dje. E bon noticia pa mundo ta cu tin 3 vacuna caba ariba mercado.
Tin e vacuna di:
- Pfizer – cu mester warda den un temperatura di -80 graden Celsius (friu)
- Moderna – cu mester warda den un temperatura di -20 graden Celsius (friu)
- Astra Zeneca – cu por warda den temperatura regular di cooler
Y lo bin mas vacuna tambe riba mercado durante e aña aki. Mester bisa si cu den e prome batch lo ricibi solamente e vacuna di Pfizer, segun e mandatario.
Diaranson 6 di januari Hulanda lo cuminsa duna vacuna na dunadonan di cuido. Minister di volksgezondheid, welzijn en sport, Paul Blokhuis ya caba a compromete su mes cu Aruba, Corsou, Sint Maarten y e demas islanan BES cu na momento cu Hulanda ricibi e vacuna, e islanan den Reino tambe lo ricibie.
Minister Oduber a duna di conoce cu ainda no tin indicacion cuanto vacuna exactamente Aruba lo haya e prome batch, pero cu esaki no lo ta hopi e prome biaha si. Pues, bisando esaki, nos no ta spera cu Aruba lo haya un gran cantidad na februari 2021.
Minister Oduber a trece dilanti cu esunnan cu prome ta bin na remarca pa haya e vacuna na Aruba ta e dunadonan di cuido y frontliners. Despues ta sigui nos grandinan den casnan di cuido, sigui pa nos grandinan riba edad di 60 aña cu ta cay den e grupo di risico. Despues tur cu ta riba edad di 60 aña y finalmente e resto di poblacion.
E mandatario a menciona cu Hulanda ta mandando freezers pa Aruba por warda e vacuna na e tempartura indica y esakinan lo yega dia 13 di januari 2021 si tur cos cana segun e plan. Tambe cu dia 25-26 januari RIVM lo ta na Aruba pa controla tur e preparacionnan cu Aruba a haci y ta haciendo pa ricibi e vacuna. Minister Oduber a trece dilanti cu lo por cuminsa duna e prome vacunanan na Aruba memey di februari 2021. “Nos ta cla pa ricibi nan y a traha duro e ultimo luna pa prepara nos mes” e mandatario a bisa.
Condicionnan di Hulanda
Pa Aruba bin na remarca pa ricibi e vacuna for di Hulanda, mester cumpli cu e condicionnan estableci pa Hulanda, asina e mandatario a trece dilanti. Un di e condicionnan ta cu Aruba lo mester entrega un plan di ehecucion.
Den e plan aki mester indica:
- Un plan di empleadonan
- Unda e ubicacionnan ta cu e prik lo bay tuma lugar
- Mester indica unda lo warda e vacunanan
- Mester percura pa tin un coordinacion di e registro
- Mester demostra cu por transporta e vacuna di punto A pa B manteniendo e vacuna na e temperatura adecua
- Mester valida e freezersnan cu lo mester warda e vacuna aden
- Mester introduci un plan di comunicacion pa comunidad
Minister Dangui Oduber a bisa cu e meta di Gobierno di Aruba ta pa den e prome kwartal vacuna mas tanto hende posibel. Pa e prome kwartal di 2021 Hulanda lo ricibi 8.2 miyon vacuna di diferente proveedo y nos ta spera cu nos por haya suficiente pa vacuna mas hopi hende posibel.
Minister Oduber ta bolbe afirma cu e ta respeta e opinion di cada cuidadano, e ta keda na cada cuidadano si nan ta tuma e vacuna si of no, e vacuna no ta obligatorio. Finalmente Minister Dangui Oduber ta keda splica cu ta hopi importante pa sigui mantene tur e protocolnan di DVG y di Crisis Team.
