Minister Oduber: Tin trabounan andando pa mehora experencia di turista crucero den Oranjestad 

Segun minister Oduber, ATA ta genera miyones. Turismo ta bayendo bon. 2018 y 2019 tabata añanan exitoso. Ta pesey Gobierno a pidi un contribucion adicional di ATA. Tin espacio pa contribui y ATA a busca e disponibilidad tambe den e caso aki pa haci ehercisionan necesario, sin cu ta perhudica turismo naturalmente. 

Turismo ta nos unico pilar economico. E ta e driver principal di nos economia. Ta pesey, na momento cu ta papia di cortamento of contribucionnan adicional di ATA den e caso aki, ta importante pa wak pa haci esaki na un manera mas responsabel posibel.

Esey ta loke cu gobierno a haci y ATA a mustra cu tin e espacio pa contribui. Gobierno ta bezig tambe cu ATA, cu tin un otro bunita proyecto, cu no a yega asina leu ainda di cuminsa e proceso di negociacion pa tuma over e ex edificio di DOW, converti esaki den un oficina di turismo. E piso abao, haci esaki un museo turistico y e di dos piso haci’e oficina.

Minister Oduber: Tin trabounan andando pa mehora experencia di turista crucero den Oranjestad 

Minister Oduber: Tin trabounan andando pa mehora experencia di turista crucero den Oranjestad. Click e link pa mas https://24ora.tv/3bPYRoK

Posted by 24ora on Wednesday, February 19, 2020

Pero esaki ta hopi curu ainda. Pero ta e intencion. Na e momentonan aki tin un edificio di ex DOW bandona y deteriora. E ta e prome impresion cu un turista ta haya na momento cu e sali for di e terminal di crucero y ta pesey kier upgrad’e y ta pesey ta den negociacion pa wak si por yega na un acuerdo pa ATA tuma esaki over.


Edificio di Aduana

Sector priva tabatin interes den e edificio di aduana pa converti esaki den un boutique hotel. Pero no tin nada concreto. Ohala cu por concretisa esaki, segun e mandatario. Tin inversionnan den Harbour House, ex Mar Azul, cu ta un bunita inversion. Un boardwalk ta bay wordo traha, sin cu ta mishi cu Stichting Rancho, sin cu ta mishi cu e pier. E acceso ta keda habri pa tur piscado. Na por yega facilmente na nan boto di pisca. No ta bin nada eybanda. Ta djis un upgrading di e area.

E intencion ta pa upgrade henter area ey. Ta bay papia logicamente cu doño di tur e kiosconan, dunando nan e prome opcion pa upgrade tambe nan kiosco. Pero e intencion ta pa henter e area aki wordo upgraded, teniendo cuenta cu e desaroyo cu ta bin na e terminal crucero y tambe na Port City.