24ora.com a tuma oportunidad di presencia di Minister di Salud Publico na Hospital pa celebracion di Dia di Enfermeria, pa puntr’e su reaccion tocante e comunicado di prensa cu Hunta di Supervision di Hospital a emiti indicando cu a tuma accion disciplinario contra Director Financiero, Gregory Croeze. Manera ta conoci, Croeze su continuacion den e posicion aki a bin den discusion despues di a keda deteni algun siman atras pa tabata tra’i stuur bou di influencia di alcohol. Minister Oduber a indica cu ta keda na cada hunta di cual Croeze ta forma parti di dje pa trata e asunto aki y yega na un determinacion.
E titular di salud, cu ta responsabel pa entre otro, funcionamento di hospital, a bisa cu tanto Croeze como director di Dr. Horacio E. Oduber Hospital, Jacco Vroegop, a forma parti di e recorido cu el a haci door di e facilidad y cu lo ta na su luga pa laga Vroegop ta esun pa duna un reaccion tocante e repercusionnan profesional di e incidente di e incidente den cual Croeze tabata envolvi.
“Hospital ta un fundacion, nos a discuti esaki. Mi a compronde cu nan a publica un comunicado di prensa pa aclaria e situacion aki di Sr. Croeze,” Minister Oduber a declara. Pa loke ta trata e huntanan di supervision cu e ta forma parti, esta na Aruba Ports Authority (APA) y na Aruba Tourism Authority (ATA), el a bisa cu “na su turno tambe lo tuma decision di kico ta e consecuencia pa Sr. Croeze. Den caso di hospital tabatin accionnan disciplinario cu a tuma contra Sr. Croez, otro boardnan lo tin accionnan similar pa evita cu algo asina ta ripiti den futuro.”
Pa mas lesa TREMPAN.
