Minister Otmar Oduber no ta esun cu por determina cu Ecological (awor EcoGas) mester cera pasobra e lo a fracasa, asina e compania EcoGas a bisa, alegando cu e mandatario ta ‘un gañado profesional’ debi na tur e ponencianan cu el a bin ta trece e ultimo tempo riba e tema aki. EcoGas, contrario na ponencia di Otmar Oduber, a duna bon resultado segun e compania y te ainda ta funciona hopi bon.
A refresca memoria di e mandatario cu contrario na loke Oduber ta sigui bisa, a funda EcoGas no menos cu 13 aña pasa bou di e nomber di Ecological Technologies Freezone N.V. (Ecological) hopi prome cu a pensa pa produci gas. E tempo ey e tipping fee na Parkietenbos lo a subi di Af. 60 pa Afl. 160 pa ton pa cubri e costo real pero Gobierno e tempo ey a dicidi di subsidia e diferencia toch, lagando e tipping fee na Parkietenbos na 60 florin. Ningun cliente di Ecotech tabata dispuesto pa paga mAs y e planta a start 9 aña pasa cobrando 60 florin y sacando recyclables manera carton, papel, aluminum, hero etc. y sobra tabata hiba Parkietenbos.
Ya caba e tempo ey Ecological a negocia cu Argos pa manda e sobra di desperdicio (RDF) pa nan planta di cement pa wordo uza como combustibel na luga di carbon. Economicamente esaki no tabata posibel cu un tipping fee di 60 florin y e proyecto pa exporta a keda pendiente. No tabatin ningun plan pa produci gas e tempo ey tampoco.
Mas of menos 6 aña pasa American Combustion di California a convense Ecological y WEB cu por converti e sobra di desperdicio den RDF y traha gas pa genera coriente. Ecological a cumpra e planta di American Combustion y WEB a inverti den su propio instalacion pa ricibi e gas di Ecological. Lamentablemente, e tecnologia cu American Combustion a demostra cu un pilot plant y cu tanto Ecological como WEB a kere aden te cu ambos empresa a haci nan inversion, no a resulta den un tamaño industrial. Ecological (cu a cambia su nomber e tempo ey pa EcoGas) a sigui inverti den mehoracion y modificacion di e planta te ora a logra pone tur cos funciona debidamente.
Pues, Minister Otmar Oduber no ta esun cu por determina cu Ecological mester cera pasobra e lo a fracasa, contrario na su ponencia, EcoGas a duna bon resultado y te ainda ta funciona hopi bon. Den e contract entre EcoGas y WEB a stipula varios condicion di calidad di e gas, den nan cu H2S no por ta mas cu 10 parts per million (10 PPM) pasobra e motor-generator lo no por a traha cu PPM mas halto. Como cu WEB a cumpra un motor-generator cu si por traha te cu 1,200 PPM Ecological (EcoGas) a pensa cu e gas cu a yega solamente 250 PPM lo no ta un problema pa WEB y pa tres luna a produci gas di bon calidad y cantidad te cu a pasa tur test cu excepcion cu e H2S tabata mas cu 10 PPM pero sin problema pa e motor.
E tempo ey WEB a propone pa muda e motor pa tereno di EcoGas pa evita e problema di H2S pero despues a hala atras y a cancela e contract na 2018, pasobra aparentemente na aña 2017 WEB a cuminsa traha riba e opcion di incinerator di Otmar Oduber. WEB no kier papia mas cu EcoGas pa busca un solucion y aparentemente ta Corte lo mester dicidi si WEB debe EcoGas of EcoGas debe WEB. No ta Otmar Oduber lo dicidi esaki!
E berdad segun EcoGas ta cu, ora cu Oduber a sinta como Minister na 2017 el a acerca EcoGas pa procesa tur desperdicio residencial (MSW) mescos cu EcoGas tabata bin ta haci cu e MSW di EcoTech. A yega na un contract despues cu su accountant a verifica e costo real pa procesa e MSW. Esaki a resulta den un tipping fee di 180 florin di cual 60 florin ta pa dera RDF den envirobales na Sero Teishi. Cu e tarifa aki a bira posibel pa manda e RDF pa Argos na Cartagena.
Esaki lo ta un gran logro pa Aruba sin costo adicional, pero si ta asina mes cu den futuro no por exporta e RDF mas, derando esaki den pitnan habri manera Butucu lo ta hopi mas economico y miho pa medio ambiente cu kima tur sushi den un incinerator. Na e pit di Butucu so por dera 30 aña di RDF di henter Aruba.
Si Minister Otmar Oduber kier pretende lo contrario, e por bin cu un estudio di impacto ambiental y economico di un empresa multinacional y experto den e materia aki pa refuta loke Arcadis a conclui den su rapport. Si Minister Oduber kier stop e contract pa EcoGas procesa MSW di Serlimar esey si ta su pleno derecho pero EcoGas por sigui funciona cu e MSW di EcoTech cu ta representa 60% di tur desperdicio residencial y comercial di Aruba.
Pero, Minister Otmar Oduber kier cera EcoGas door di prohibi pa EcoTech hiba su desperdicio (MSW) pa EcoGas. E kier cera EcoTech tambe door di cobra tur cliente di EcoTech dobel maske cu Serlimar no ta recoge nan desperdicio. Obviamente ningun hende kier paga dobel y EcoTech lo mester cera y atrobe Otmar Oduber y su voceronan lo kier grita cu ta pa mal maneho mientras cu tur esaki ta parti di su plan pa cera EcoGas y EcoTech for di 2017. Pero no ta cuestiona su mal maneho den Serlimar cu ta core pa cuenta di pueblo.
E compania madre MetaCorp ta sigura cu den 100 aña semper a cumpli cu su obligacion y a paga tur su debenan. Si Hues dicidi cu mester paga WEB algo, MetaCorp lo cumpli y si Hues dicidi cu WEB mester paga MetaCorp, sigur cu nan lo cumpli. “No ta Otmar Oduber ta dicidi. Mientrastanto Otmar no por acusa MetaCorp di nada” e compania a finalisa bisando.
