Minister Oduber: Frontera pa Merca a habri cu 0 test positivo

3490

Ayera nos isla a bolbe habri frontera pa Merca, despues cu e tabata cera for di maart pa mas cu 3 luna. Riba e prome dia di reapertura a test un total di 215 turista aki na Aruba, di cual tur test a sali negativo. Esaki sigur ta un bon comienso pa Aruba riba e prome dia di reapertura.

E proceso completo pa e turista, for di yegada na Aruba te cu salida di airport tambe a cana optimal segun plan. Lo sigui evalua e proceso regularmente pa por brinda e miho servicio posibel pero mas cu claro teniendo na cuenta tur aspecto di siguridad.

Un palabra di gradicimento ta bay na tur organisacion, departamento, actornan y na cada persona cu a contribui na haci ful e proceso di reapertura di e frontera di Aruba uno mas sigur posibel pa nos comunidad y pa nos turistanan.

“E yamada na comunidad ta pa sigui cumpli cu e reglanan di prevencion cu ta encera higiena di man; si bo ta malo keda cas y haci test, mantene distancia fisico di minimo 1.5 meter y evita mishi cu boca, nanishi y wowo. E medidanan aki ta importante pa nos por sigui preveni cu e virus por plama atrobe riba nos dushi isla”, asina Minister Dangui Oduber a termina bisando.