Minister Oduber: Desde awe Aruba ta Covid-FREE

3312

Despues cu a anuncia e prome casonan di Coronavirus na Aruba dia 13 di maart 2020, un rato pasa Minister Dangui Oduber a anuncia cu e ultimo pashent, esta Humberto Jose Fuenmayor-Morales a test NEGATIVO awe pa Covid-19. Algun dia pasa el a test negativo caba pero a warda pa haci un di dos test pa ta sigur cu e no ta portado di e virus ey mas. E ta recuperando satisfactoriamente. Cu esey, desde awe no tin ningun caso activo mas di Coronavirus na Aruba.

For di ayera nos redaccion tabata na altura cu e pashent a haci testnan nobo y cu tabata pendiente awe pa e resultadonan, cu danki Dios a sali positivo pa e pashent y pa henter nos comunidad.

E mandatario, aunke hoben y sin experiencia riba tereno di salud publico, a hay’e ta atende cu un pandemia sin prescendente y sin un manual. Uzando e miho practicanan di WHO na nivel mundial y cu Hulanda como nos guia, a institui un ekipo di expertonan pa conseh’e riba decisionnan relaciona cu combatimento di e virus y recuperacion di pashentnan.

E mandatario a logra, dor di su empeño cu Gobierno Hulandes, pa haya sosten den ekiponan necesario pa unidadnan di Cuido Intensivo pa nos Hospital. Di e forma ey a subi di 6 cama pa 33 cama pa Aruba, haciendo nos e di dos pais na mundo cu mas cama di ICU (mashin di hala rosea) disponibel pa cada 100 mil habitante.

Via un campaña publicitario nacional, hunto cu mensahenan a base diario durante dos conferencia di prensa pa dia, a logra comunica e mensahe di prevencion na comunidad. Den e proceso a haci uzo di medidanan drastico, manera “shelter in place” y tambe “Toque de Queda” banda di cera scol, misa, barnan, negoshinan y mas.

Ta un impacto cu probablemente tur ciudadano lo biba solamente un biaha den nan bida. Ta cada 100 aña tin un pandemia y a toca nos pa biba e situacion aki. E no tabata un tarea facil, specialmente pasobra contrario na otro situacionnan den pasado, e influencia di rednan social a hunga un rol grandi, sea pa yuda of pa plama informacionnan robes of falso. Esey a pone un peso adicional riba e esfuersonan den e ambito di comunicacion.

Mester bisa si, Minister Dangui Oduber hunto cu e ekipo di Bureau Rampenbestrijding Aruba, Hospital, DVG y otronan, a percura pa un formula cu na final a duna bon resultado. Den dos luna di tempo a test un cantidad record di casonan sospechoso, a logra haya 101 persona contagia y awe por bisa cu 98 persona a recupera di dje. Tabatin solamente tres morto, aunke cu e asociacion di specialistanan ta debati dos di e casonan cu nan ta haya cu e pashentnan no a muri pa motibo directo di e virus. Pero asina mes, 3 caso den 101 ta representa un nivel di 3% mientras cu na mundo e averahe ta entre 6% pa 7%.