Durante su discurso awe mainta, na e manifestacion cu e mes a organisa, Minister Otmar Oduber a reta Parlamentarionan, entre otro su coleganan di coalicion, pa cuidao nan mester laga e trahadonan di Serlimar cay den e reunion programa pa dia 23 di september proximo. E dia ey lo mester vota pa duna Serlimar monopolio riba servicio di recogemento di sushi domestico pero tambe den procesamento di desperdicio.

Un cantidad di trahado a sali awe pa un manifestacion dilanti oficina di Gobernador, dilanti Parlamento y despues na Conseho di Minister. Trahadonan a bisa cu tabata Ofelia Beyde y e propio Minister Otmar Oduber cu a prepara e manifestacion, a paga pa e avisonan den media y a laga cambia rooster di trabou di trahadonan pa bay manifesta enbes di percura pa recogemento di sushi na cas y negoshinan.

Un empleado a lesa e manifiesto, traha den propio Ministerio di Infrastructura, pa despues e Minister contesta e trahado di e contenido cu e mes a skirbi pa nan. Den su contesta el a pidi e trahadonan pa sigui brinda e bon servicio cu nan ta brindando e ultimo temponan. Tambe cu e ta spera cu politiconan lo sa di sostene e ley aki dos siman den Parlamento. E no por imagina cu ningun fraccion lo por vota contra di e trahadonan di Serlimar.

Di e forma aki e Minister, na cabes di partido POR ta pone presion riba su partnernan di coalicion, esta RED y MEP. Tabata obvio cu por lo menos dos Parlamentario di MEP a contest’e mesora riba Facebook, aunke sin menciona su nomber, pero toch suficiente cla pa e haya su contesta bek. Den gangnan di Parlamento ta bisando cu den MEP lo tin por lo menos dos Parlamentario cu lo no sostene e ley di Serlimar, por lo menos no manera cu e ta awor aki.

Despues di entrega e manifiesto awe, e trahadonan di Serlimar a regresa nan trabou bek. E camindanan rond di Bestuurskantoor a keda cera y blokia pa por lo menos dos ora, causando e debido filanan den varios area di Oranjestad.

Comments

comments