Minister Oduber a perde guera: Ningun interes pa bin cu Incinerator pa Aruba!

Un rato pasa a sali na cla cu oficina di Notario Johnson a anuncia cu tur interesado den e Request For Proposal pa e “Solid Waste Treatment Facility” tabatin oportunidad te cu 1:59pm pa entrega nan proposicion. Pero, e Notario a constata cu no a ricibi ningun proposal. Di e forma aki a cera e destaho aki tambe!

Ta algun dia caba cu NGO nan y expertonan riba e tereno di medio ambiente a alerta cu e idea aki pa bin cu un Incinerator na Aruba no ta factibel pa varios motibo. Un di nan sigur ta e inversion envolvi den e proyecto aki, esta di 500 miyon florin. Esun cu bin cune lo mester tin garantia cu Gobierno ta dispuesto pa por lo menos triplifica e “tipping fee” di 180 florin cu ta cobrando awor pa procesa sushi.

Ta bin acerca cu e inversionista cu gana e destaho aki, mester tin garantia cu WEB lo cumpra e 5 MW di coriente for di dje na un suma determina. Sino ta con lo por participa sin sa con lihe por recupera e inversion haci? Y riba dje, mester tin garantia cu Gobierno lo no sigui pusha mas pa separacion y reciclahe di sushi, pasobra tur esey ta traduci den menos sushi pa kima den e incinerator. Si mira e caminda cu tanto EcoTech como Serlimar ta canando, ta evidente cu tur lo sigui e idea di Gobierno pa promove un “economia circular”.

Minister Otmar Oduber lo bay evalua e proceso aki awor pa tuma un decision riba e siguiente paso pa logra yega na un solucion pa e problema di maneho di desperdicio. Segun e Minister, el a constata cu un factor principal tabata e falta di tempo y complexidad di e proyecto, banda di e interes grandi pa a participa. Bisando esey e lo kier mira con toch tene un destaho, aunke cu esun aki a cera caba y no por habri mas.

Un di e alternativanan riba mesa ta keda e formula di EcoGas, esta di separa sushi, proces’e den envirobales y exporta pa Colombia, pa uza como combustibel den forno pa traha cement. Di e forma aki e impacto ambiental ta yega na casi nada pa Aruba y no mester tira nada mas afo riba dump. Varios politico ya a expresa di ta simpatisa cu e idea nobo aki, mescos NGOnan cu ta semper na fabor di reduci molester na naturalesa, na medio ambiente y na comunidad engeneral.