Minister Mike de Meza: Partido AVP no tin hamber pa poder

Minister Mike de Meza, durante un conferencia di prensa diaranson mainta, a splica cu AVP a
wordo invita pa bay cerca informador.

Pero ya caba, pa dia 22 y 23 di September, despues cu e resultadonan tabata conoci, por a scucha lider di partidonan menciona, cu nan kier bay forma un Gobierno hunto, lagando partido AVP afo. A tuma e invitacion di informador na serio, maske tin cu bisa cu ya caba tabata tin informacion cu aparentemente MEP, POR y RED tabata combersando. Un banda el a cuestiona, trece duda di proceso di informador, pasobra lo a spera cu e proceso ey lo a tuma luga prome, despues bay gobernador bek pa e ora bay wak si partidonan lo por a sinta na mesa y yega na cierto comprondemento. A bay na Gobernador y tabata tin dos punto den su opdracht. Uno ta pa wak si tin disponibilidad pa forma un Gobierno y e otro ta pa wak si tin disponibilidad pa bay haci un investigacion. Riba e dos preguntanan ey, AVP a contesta hopi cla y raspa y a bisa cu mirando e importancia di Goberna na un forma sostenibel y stabilidad, ta mas cu disponibel pa scucha den e caso aki e partido grandi cu ta MEP, pa sinta na mesa y wak si tin seriedad pa yega na un base amplio real di 18 asiento.

Tin decisionnan sumamente dificil cu mester a tuma durante 8 aña. Tabata tin decisionnan
dificil cu partido MEP mester a tuma durante nan 8 añanan di Gobernacion y ta premira sigur
sigur cu e añanan nan dilanti tin decisionnan dificil cu tin cu tuma y pa haci esey, tambe ta
kere cu den un momento cu Pueblo a split e votonan y no a duna un partido e mayoria
absoluto cu bo mester realmente mira si tin e posibilidad di traha den un base amplio, den e
caso aki. Ta papia di dos partido grandi cu por haya 18 asiento.
Pero na fin di dia, e mester ta algo serio si. Mester por sinta na mesa y combersa, dialoga cu
otro y wak e diferente programanan cu tin. Aparentemente no tin e interes aki di parti di MEP.
A trece hopi cla na Gobernador, partido AVP no tin hamber pa poder. Nan ta Goberna na
momento cu nan wordo yama pa Goberna. Na momento cu pueblo pone nan pa Goberna,
semper den e interes general di pueblo di Aruba y si esey no lo ta e caso, e ora eynan nan lo
bay den oposicion y lo tin un oposicion hopi duro, caminda cu nan lo sali sigur sigur na
vanguardia di tur e ciudadanonan di Aruba y lo tin un control severo riba Gobierno di Aruba y
nan no lo acepta tampoco locual cu a wordo priminti den campaña cu wordo haci diferente,
pasobra cu sa di partido MEP, historicamente ta bisa cu Campaña ta un cos Goberna ta otro
cos. Mester tin madures pa sinta hunto y e ora ey Goberna tambe e pais aki pa e interes
general y riba un manera serio.
Pero tambe e stabilidad di un Gobierno ta sumamente importante, vooral ora cu bo tin
coalicion.
Historia di coalicion na Aruba y tambe tuma e ultimo 10, 20 añanan y mira kico tabata tuma
luga na Corsou durante 8 aña di Gobernacion di MEP, caminda cu tabata tin un prome
minister, y sigur despues di Status Aparte di Corsou y St. Maarten tambe, durante
Gobernacion di AVP cu nan tabata tin 1 prome minister, Corsou tabata tin por lo menos 6
prome minister, St. Maarten por a mira, Gobiernonan a cay tras di otro, caminda cu tabata tin
diferente prome minister, cu por a mira e situacion na Boneiro. Por mira e ultimo añanan aki,
cada dos pa tres luna, gobierno di Boneiro ta cay. Si mira e situacion di Hulanda tambe,
durante ultimo 8 añanan, Hulanda tabata tin por lo menos 4 pa 5 diferente Gobierno y te dia
di awe no por forma un gobierno pasobra nan tin cu forma un coalicion y ta mira hopi biaha
cu e partidonan chikito tin un presion desproporcional cu exigencianan riba partido grandi cu
for di Maart cu Hulanda tabata tin eleccion te dia di awe, despues di 200 dia, ainda no por a
forma un Gobierno.
E ta bisabo tambe kico lo spera den e luna y añanan nos dilanti cuna momento cu ta mira
tres partido ta bay forma un Gobierno cu un mayoria marginal di 11 of 12 asiento y bo ta mira

caba awor aki tras di cortina cu ta wordo negosha, bo ta mira un di e lidernan ta sali bisa un
cos. E siguiente dia e otro lider ta bisa un otro cos y ta cuminsa ranca cakiña ken ta haya cua
ministerior.
A kere cu normalmente ta sinta prome pa papia di programa, pero ya caba a cuminsa bisa
uno kier turismo, e otro kier husticia. E otro partido ta bisa cu husticia cu turismo no ta haya,
pasobra e ta keda pa partido grandi. Ya caba bo ta mira problema. Bo por imagina ki sorto di
Gobierno bo ta bay tin den futuro si e tres partidonan aki forma un Gobierno. E ta trece un
instabilidad sumamente grandi pa gobernacion di Aruba y e no ta bay ta sostenibel. Esey ta
bay hiba nos basta aña atras. Na momentonan sumamente importante, caminda AVP den
Gobierno a traha riba crecemento di economia, stabilidad financiero. Tur por corda cu ora cu
a drenta Gobierno na 2009, de Meza como minister di finansas, ta corda cu di inmediato nan
a wordo presenta cu un presupuesto supletorio cu mester a bay Parlamento cun'e cu tabata
riba 153 miyon florin adicional cu a wordo gasta. Por a corda tambe cu a ricibi e presupuesto
den concepto, pa 2010, cu Gobierno di MEP a laga atras, cu tabata tin un deficit di e
presupuesto riba di un mey biyon florin. Riba di 500 miyon florin. Por corda den e
presupuesto ey cu nan consehonan tabata e momento ey, pa aumenta BBO for di 3% hib'e
na 6% of mas. Por escrito manera cu haci den pasado, lo trece e documentonan aki dilanti.
Esaki ta e tipo di gobernacion cu ta premira cu lo bay haya. Te awor aki tin cu bisa cu ta
contento pa scucha cu MEP y POR a laga sa cu nan no ta bay tuma medida. Ta spera cu nan
wanta nan mes na esey tambe, pasobra lo ta hopi interesante pa mira ta den ki forma e dos
partidonan aki ta bay Goberna.
De Meza a sigui splica cu ora cu scucha cuenta di buraco den presupuesto y cu kier bay
haya un estudio. Esey tabata e di dos opdracht di informador pa bay busca un institucion
internacional, pa bay haci un estudio. AVP ta haya cu ta completamente inecesario. Ora cu a
drenta Gobierno, no tabata tin jaarrekening. Na 2012, bay bek for di 1986 te 2011 y a traha
jaarrekening pa tur e añanan ey. Awe por ta sumamente orguyoso di bisa cu tur aña tin
jaarrekening y tur ta wordo trata den Parlamento. Te hasta tin jaarrekening di 2016 caba cu a
bay Parlamento tambe. Tin informacion, tin kwartaal rapportage. Tur kwartaal riba un manera
hopi extenso y detaya, ta duna raportahe, CFT ta duna su rapportnan. CFT ta scucha
Gobierno, CFT ta sinta cu Parlamento y tur informacionnan aki ta wordo publica. Tin cu bisa
cu den esey, tin e rapportnan di Standard & Poor's di tur aña. Tin e rapportnan di Fitch di tur
aña. Cada dos aña di rapport di IMF. Tin departamentonan di Gobierno cu ta saca nan
rapportnan. Tin pensioenfond APFA ta saca su rapportnan, SVB, AZV, tin nan rapportnan. Tur
e rapportnan aki tin. Ta inecesario pa diripiente pa bay busca hendenan di afo cu no conoce
sistemanan na Aruba pa bin traha un rapport cu no ta bay bisa nada mas y nada diferente cu
tur e rapportnan aki ta bisa. Locual cu nan ta busca ta un hustificacion pa crea oportunidad di
bin cu hendenan di afo pa gaña pueblo y bisa pueblo, kico e hendenan a bisa y tin cu tuma
medida riba pueblo. Esey ta bay ta inaceptabel sigur sigur pa partido AVP den oposicion.
De Meza a alerta e Gobierno instabil y cu no ta sostenibel ey, cu aparentemente ta bay wordo
forma cu nan no ta bay acepta e tipo di trikinan ey. Tin cu agrega, e cuentanan anual ta up to
date. E presupuesto di 2017 ta den efecto, por mir'e. Ya caba por mira cu a meet e target di
un deficit di 0.5%. Nan tabata na 0.7% hopi cerca di dje. Por a mira e añanan anterior, a meet
e normanan. E targetnan cu Gobierno, hunto cu CFT a pone riba papel. Ta spera cu e
Gobierno, den concepto, cu ta formando awor aki, lo por sigui meet esakinan. E unico
manera cu ta mira, conociendo e partidonan aki, lo kier bay y e forma cu ya caba cu nan ta
papiando di dje, ta pone medida riba lomba di pueblo, cu ta bay bira algo inaceptabel.