Crimen ta afecta no solamente Corsou, pero Aruba tambe. Parlamento di Corsou tin atencion pa esey den un reunion. Minister di Economia, Giselle Mc William, a comenta cu algun miembro di Parlamento riba e diferente atraconan cu tin riba turista y en general.

A invita e minister Mc William como minister di Economia y di Turismo, como tambe Minister di Husticia, Quincy Girigorie. E minister ta contento cu nan a yama e reunion, pasobra ta mustra e importancia y e balor cu nan ta duna na e sector turistico.

Minister Mc William: Mishi cu un turista, ta mescos cu mishi cu bo pais y cu bo prohimo

Minister Mc William: Mishi cu un turista, ta mescos cu mishi cu bo pais y cu bo prohimo

Posted by 24ora on Wednesday, November 27, 2019

E mandatarionan a ricibi tur e preguntanan y duna contesta y Parlamento a duna nan e comodidad pa sigui cu loke cu nan ta haciendo, na nan alcance, pa mitiga e situacion aki. Di parti di Ministerio di Economia y Turismo, cu CTB cu ta cay bao di dje, tin e Politur.A importa Politur na Corsou y dun’e e twist, pa asina salvaguardia e siguridad di e turistanan. E no ta suficiente si. E ta demostrando cu tin di haber cu fondo, tin di haber cu mas hende pa traha pa mas vigilancia. Segun e mandatario, nan ta riba bon caminda pa haci mas tanto posibel pa por salvaguardia e siguridad di e turistanan, cu no por descarta completamente. Pero ta haciendo nan best pa haci esaki.

Tin un situacion economico dificil, caminda cu ta haya hendenan ta busca otro alternativa. Pero no mester lubida cu tin hopi hende cu ta bin for di otro parti di mundo, y door cu nan ta na un manera ilegal na Corsou, ta busca e manera mas facil pa sobrevivi. Ta algo cu no por acepta. Pasobra ora cu mishi cu un turista, ta mishi cu un mama y tata cu ta haya trabao for di e turista aki. “Bo ta mishi cu e inversionnan cu gobierno a haci pa laga e turista aki bin y tipo di reunionnan aki, netamente ta pa splica e impacto y embergadura cu turismo positivo tin pa e pais. Pero na momento cu atraca of mishi cu e turista, por tin un impacto negativo tambe pa e pais.”

Segun Mc William, Cuerpo Policial, cu tur su retonan ta haciendo su trabao. Constantemente nan ta haciendo nan best y ta captura e suhetonan aki. Pero ta un situacion delicado cu nan tin pa diferente factor. Eynan tambe ta sinti cu ta desea cu por tin mas recurso financiero pa por duna nan e hermentnan necesario pa t’ey rond di Corsou. Pero e no ta posibel, sinembargo ta haci’e na un manera creativo hunto cu Politur.
Ta poniendo camara pa asina por yuda mitiga e situacion aki.
Minister Giselle Mc William tin un mensahe pa e malandronan aki. “Turismo t’ey pa tur; P’abo, p’ami, pa bo bisiña, pa bo mama y pa bo ruman. E turista ey ta inverti den bo pais cu mañan cu Dios kier, nos por zorga pa por paga scol pa e yiu, pa por paga un onderstand pa bo yiu, pa percura pa tin camindanan pa e yiu pa por cana riba dje. Bo tin auto, bo ta core riba camindanan cu ta wordo paga for di e cen aki. Turismo no solamente ta e persona cu bo ta mira cu ta cana bin, saca potret; e ta invirtiendo den bo pais y invirtiendo den trabao, invirtiendo den e economia di bo pais.

Prome cu bo mishi cun’e, pensa kico bo ta haciendo. Bo ta bezig ta mishendo no cu e turista, pero cu bo pais y cu bo prohimo.”

Comments

comments