Minister Marisol Lopez-Tromp a sali bek pa Hulanda cerca su famia

8241

El a biaha diadomingo atardi pa Hulanda y a yega dialuna mainta. Situacion tenso den politica y un reunion extraordinario yama den Parlamento na Aruba pa bah’e como Minister a causa cu el a sali diahuebs mainta bek pa Aruba y a yega atardi, pa por a participa diabierna 8:00am den e reunion publico cu unico punto di agenda: desconfiansa den Minister Marisol Lopez. Despues di a defende su mes ayera, awe el a papia mainta cu Minister Presidente y awe tardi a bay Aeropuerto pa subi avion y regresa Hulanda cerca su casa y dos yiunan. 

E motibo dicon a bay vakantie Hulanda pa tres siman ta precisamente pa hiba nan yiu mayo, Dominique Lopez, pa por establece su mes y start cu su estudio na Maatsricht, na Hulanda. Ta un momento importante den bida di su yiu cu como mama e no kier falt’e. El a yega su vakantie y a manda informa Conseho di Minister y Parlamento di e biahe. 

Minister Marisol Lopez saliendo bek pa Hulanda pa sigui sostene su yiu

Posted by 24ora on Saturday, August 1, 2020

Awe a puntr’e riba su reaccion riba e conferencia di prensa yama pa Minister Andin Bikker, cu alabes ta lider di partido POR. Lopez a keda straña cu Bikker a opta pa yama un conferencia di prensa toch, siendo cu ayera a pospone e reunion pa partidonan por a papia. Ta con por cuminsa un proceso di intermediacion si awe ta atac’e publicamente atrobe. Asina mes Lopez a papia cu Minister President Evelyn Wever awe y lo start e intermediacion den e dianan nos dilanti, probablemente via zoom. Wever mes tambe ta na cas recuperando di un operacion medico cu el a haci diasabra siman pasa. 

Contrario na diahuebs atardi ora el a yega, awe si Polis a percura pa escolta e mandatario den Aeropuerto pa hib’e na su avion. E departamento di protocol di Conseho di Minister si a opta pa no ta presente, kisas pensando cu sigur e lo no ta Minister mas.

Pa loke ta e asuntonan cu Minister Bikker a vocifera, e Minister a bisa cu e tin prueba di tur cos cu el a bisa den Parlamento, a pone documentonan ter inzage ayera y si mester e lo publica nan tambe pa pueblo por lesa. Ta asuntonan cu ta hole na decisionnan robez, cu por hinca e Minister den problema. Ta e tipo di decisionnan asina kier fors’e tuma y como cu e no ta coopera, a cera cabes pa bah’e como Minister den Parlamento. 

Como cu pueblo henter a sigui e reunion aki, mayoria via 24ora.com, tur hende por a compronde masha facil ta kico ta e motibonan real dicon kier baha e Minister di su puesto. Na final mayoria a conclui cu Marisol Lopez berdad a gana e bataya ayera pero awor Evelyn Wever tin un problema mas serio….e ta den un Gobierno cu un partner cu ta yena di casonan di corupcion, den tur e Ministerionan cu e ta representa. Ta bale la pena sigui? Un contesta lo mester bin e siman aki.