Minister Marisol Lopez no a presenta den Conseho di Minister: Impasse den Gobierno no ta soluciona!

Un publicacion di Minister Andin Bikker awe mainta riba su pagina di Facebook a causa bastante problema interno, tanto den partido POR como tambe den coailicion mes. Den POR pasobra e mayoria di e miembronan di partido no ta di acuerdo cu decision di e lider temporal, esta mr. Andin Bikker. Den coalicion pasobra nan a pensa cu esaki e impasse ta soluciona, pero parce cu no ta tur hende ta mir’e asina. Ta mustra cu MEP y RED tambe mester tuma un posicion, prome cu gobernacion por sigui.

Situacion den POR

Ta for di algun siman caba e situacion den e partido politico POR no ta di “canta macamba”. Desde supuesto salida di Otmar Oduber, el a laga tur “su hendenan” strategicamente posiciona eyden pa toch e mantene liderazgo for di pafo. Ta mesun strategia cu el a hiba den gobierno tambe, caminda keto bay e ta infiltra y logra “regla cosnan” pa su compania priva di acesoria. Pa awor a apunta Andin Bikker como lider, mientras cu a keda di yama un eleccion pa liderazgo dentro di poco. E lo sosode prome cu e siguiente eleccion, cu ta programa pa september 2021.

Conseho di partido (Partijraad)

Ayera nochi a tuma luga un reunion di conseho di partido POR (Partijraad) pa atende e asunto di Marisol Lopez-Tromp. Claro cu e mes no tabata invita na e reunion, pasobra e partido a sac’e afo y e no ta forma parti mas di e organisacion politico. Parce cu durante e reunion, mr. Andin Bikker a informa esunnan presente, mas o menos 10 persona, di e proceso di intermediacion y di e status awor den e relacion. El a informa Conseho di Partido cu pa bon di nos pais, pa stabilidad y pa evita mas agitacion y polarisacion den un momento di crisis, cu e ta propone pa tolera Marisol Lopez den e funcion di Minister den representacion di partido POR. Den esey a splica cu e dos parlamentarionan ta di acuerdo cu e posicion di partido.

Pero ta parce cu e simpatisantenan y coordinadornan di partido no a keda contento cu e salida elegante aki. Awe lo a drenta varios retiro di miembronan di Conseho di Partido. Den cierto forma nan ta manda un señal cla pa liderazgo di partido cu nan no ta di acuerdo cu e decision aki, esta pa tolera Marisol Lopez. Den cierto forma nan ta mira cu asina POR a perde cara den henter e debate politico cu a cuminsa internamente den e partido y despues publicamente den parlamento y den medionan di comunicacion.

Impasse MEP-POR-RED

Aunke cu e partido mas grandi ta purba benta e problema den scochi di POR, e realidad ta cu e impasse ta den henter coalicion. Esaki debi cu e fraccionnan di MEP, POR y RED a pidi pa yama e reunion di desconfiansa den Parlamento mientras cu 7 Minister den coalicion a firma cu no por traha cu ne y cu mester kira e carteranan di Marisol Lopez. Cu e realidad ey riba mesa awo, e posicion di POR pa tolera Lopez y sigui padilanti, no ta soluciona e impasse. Tanten cu MEP y RED no hala nan cartanan aden, tur cos lo por keda mesun cos. Lo keda na liderazgo di MEP y RED pa dicidi con nan kier sigui of si nan ta manda informa Parlamento cu awor si nan ta dispuesto pa sigui traha y cu e carta cu nan a manda pa kita cartera no ta vigente mas.

Ken ta perde cara?

Politica ta un arte cu hopi hende gusta y kier practic’e, pero e tin su “kenshi”. Ta un arte di strategia cu poco por domina. Ex Minister Presidente Nel Oduber tabata hasta bisa den forma chistoso cu “den wega di schaak no tin burico”, indicando cu den e wega di strategia no por comete eror. Den e caso aki, tin hende lo mester perde cara. Sea Andin Bikker, sea Marisol Lopez, sea Rocco Tjon, sea Ricardo Croes, sea Dellanire Maduro, sea Evelyn Wever, sea Arie Swaen of tur e Ministernan. Un hende lo sala ganado y otro perdedo. Ta depende ki movecion strategico cada hende individual of partido lo tuma, cu lo determina con e asunto lo desaroya y yega na sea un final feliz of un final cu hopi daño.

Te awor, Minister Marisol Lopez-Tromp ta sinta den e stoel di ganado y a crece politicamente den e ultimo simannan. Un intento di coalicion pa bah’e a pone tur luz riba dje. El a probecha di e atencion completo y a move su pionnan den e wega di schaak di tal forma cu el a hinca tur e parlamentarionan den su saco. E reunion publico a causa mas daño na MEP, na POR y na RED cu na esun cu nan lo “kier” a baha como Minister. Al contrario, Marisol Lopez a crece y a haya opinion publico su tras para, hincando e den un posicion comodo pa sigui negocia na su fabor.

Di dos tanda di reunion publico

Ta parce tin ora cu ta haci hopi esfuerso pa e reunion publico di parlamento no continua. Den cierto forma, pa e di dos tanda, pa e minister por hiba palabra den parlamento, no sigui. Esey pasobra ta varios asunto falta pa bin padilanti ainda, varios investigacion cu e lo kier a aclaria y hasta awo cu tin asuntonan nobo, cu tambe mester mira luz di dia. Un fecha fiho pa e reunion no tin ainda, aunke cu Presidente di parlamento a menciona di tin pensa di yama e reunion pa diaranson of hasta prome, depende di e carta cu e ta sperando riba final di e intermediacion den Conseho di Minister.

Parce cu Marisol Lopez ta sperando riba e di dos tanda di e reunion sigui, pa gobernacion por continua normal atrobe. Despues cu e splica su posicion den e reunion publico, e ora lo por spera continuacion di reunionnan regular di Conseho di Minister. Pero, esey atrobe lo depende di e final di dicho reunion, si e daño politico lo ta limita na POR of si e lo pasa y afecta MEP of RED tambe den e proceso.

Marisol Lopez tin e yabi di Conseho di Minister den su saco

Ta un situacion unico den nos historia politico, esta cu tin un minister demisionario, sin representacion politico, pero cu tampoco ta un “zaken minister”. E partido lo mester toler’e di awor te september 2021 ora bin eleccion. E lo mester por funciona den Conseho di Minister y tuma decisionnan sin sigui instruccionnan di POR. Esaki ta precisamente locual a pone e partido rabia, esta cu Lopez no kier a sigui ordo di Otmar Oduber y ni di Andin Bikker. Kiermen den cierto forma, Marisol Lopez a gana e bataya aki pasobra nan lo lag’e como Minister sin cu e ta pertenece na POR y sin tene nan na cuenta.

Pero di otro banda, durante e impasse, Minister Presidente Evelyn Wever a menciona cu tin por lo menos dos Minister cu no kier a sinta den Conseho di Minister cu Marisol Lopez. Un di nan tabata Andin Bikker y e otro tabata Dangui Oduber. E motibo dicon Oduber a rabia cu ne no ta conoci. Tin varios rumor, pero no cu nunca Minister Lopez-Tromp mes a papia di Oduber durante su discurso den Parlamento of den entrevistanan. Pues bisando esey, ta necesario pa MEP y Minister Dangui Oduber sali afo pa confirma cu ta hala nan decision di no kier sinta cu Lopez aden y asina avisa publicamente cu Marisol Lopez ta “bonbini” atrobe den Conseho di Minister.