Aunke no ta nada straño di Gabinete Wever-Croes cu semper tin scondemento of no ta mucho familiar cu prensa. Mas bien ora ta trata di topiconan cu no ta mucho confortabel pa nan. Esaki por medio nan minister di finansa a bolbe demostra un biaha mas diaranson merdia durante un conferencia di prensa di gobierno. A puntra e mandatario pa un reaccion riba e 7.6% di recorte di salario di e ambtenaar.
Awo, e propio gobierno tabata boca yen cu COHO ta for di mesa pero ainda no a splica kico ta bay pasa cu e recorte di ambtenaar. E pregunta tambe ta si e placa ta presupuesta y si tin e garantia cu lo paga e cen e aña aki ainda. A compronde hasta cu ta conseho di minister di Reina tin cu tuma un decision riba e situacion aki. Ta preguntanan cu ta sin contesta na e momentonan aki.
Minister Xiomara Maduro a contesta bisando cu awo no ta e momento oportuno pa contesta e preguntanan y cu e lo papia solamente riba Cultura, no obstante cu e ta minister encarga cu finansa publico. Ta cuestion di keda pendiente p’asina wak ki dia e minister haya su santo gana pa conta e ambtenaarnan, ki dia nan lo cobra nan salario completo bek. Tin di remarca si cu, e sindicatonan cu representa e funcionarionan publico ta manera na soño riba e topico aki.
