Gobierno: “No por planea mas pa un carnaval e aña’ki”

Aunke ora cu a tuma e decision aña pasa cu ta pospone temporada di carnaval 2021 for di inicio pa memey di aña, na e momentonan aki no tin nada concreto cu lo tin carnaval mes ainda. Den e ultimo conferencia di prensa di gobierno, minister di Cultura Xiomara Maduro a papia di e tema aki y di e ultimo reunion cu e tabatin cu SMAC, organisado di carnaval.

Durante e encuentro aki SMAC tabatin kier sa opinion di gobierno y un biaha mas a enfatisa cu gobierno no ta bay fomenta aglomeracio. “P’esey pa e aña’ki no ta mira carnaval factibel mas, den e forma tradicional. Mi a pidi SMAC trece alternativa pa celebracion di carnaval cu no ta na e forma tradicional,” minister di Cultura Xiomara Maduro a expresa.

SMAC a keda di bay consulta cu su miembronan, cu ta e gruponan di carnaval, riba e posibilidadnan cu por tin algo di carnaval toch e aña’ki. A papia si cu mester tene cuenta cu tin hopi cosnan tumando luga den forma virtual.

E mandatario tambe a reuni cu e grupo di MUSICA, cu tabatin un plan caba riba mesa y a pidi pa amplia e plan aki y pa present’e den forma oficial na gobierno.

Gobierno: “No por planea mas pa un carnaval e aña’ki”

Gobierno: “No por planea mas pa un carnaval e aña’ki”. Lesa mas https://24ora.news/30mZfXj

Posted by 24ora on Saturday, March 6, 2021

No mester lubida, carnaval ta tuma su tempo y normalmente pa luna di september mester tin tur informacion y plannan cla e celebracion di e siguiente aña. Awo den un pandemia, cu no sa ki direccion e ta tuma, e situacion ta bira hopi dificil pa planea kico ta bay pasa. Mas ainda ora cu ta papia di carnaval cu tin hopi aglomeracion.

Gobierno no a haya ningun indicacion cu tin pensa di cambia nan reglanan exisente. Den cuadro di e planificacion gobierno no por bisa SMAC pa cuminsa cu e plannan di otro aña. Carnaval ta haya apoyo di mundo comercial, cu ta pasando den situacion dificil, unda cu gobierno mester a bula aden y duna subsidio di salario of FASE cab ana 60% di e forsa laboral, pasobra comercio no por carga esaki. “Pa haya fondo pa e grupo di carnaval ta bira mas dificil.”

Esaki ta e momento oportuno pa SMAC bini cu innovacion y wak con otro por celebra carnaval. Tur esaki ta depende tambe si tin celebracion otro aña of no. “Di nos banda no por duna siguridad cu lo tin e paradanan otro aña.”

Minister Maduro no ta kere cu SMAC lo logra keda cla pa un celebracion memey di e aña’ki. Pa por haci esey, mester tabata cla cu e preparacionnan aña pasa den luna di September. Pero e tempo ey Aruba tabata den e di dos ola di COVID-19 y el a kita tur siguransa cu tabatin. No por a planea mas pa un carnaval pa e aña’ki.”