Minister Maduro: Impuesto di importacion den april a baha mas cu 60 porciento

Awe finalmente Minister di Finanza Xiomara Maduro tabata den Parlamento pa contesta pregunta relaciona cu e programanan di ayudo financiero cu a bini cu ne den cuadro di e crisis cu e país ta pasando aden pa cu presencia di coronavirus. E mandatario a splica cu e sosten financiero tabata reparti den cinco programa, cual nanta e Alivio Fiscal; FASE; Sosten Financiero pa Kwartaal; Subsidio di Salario y Qredits.

Dunando un resumen of update di e programanan aki, el a bisa cu 507 compania a haci uzo di e facilidad di Alivio Fiscal,  pa paga e impuestonan di april, mei y juni 2020; 325 compania a haci uzo di e descuento di pago di AOV/ AWW den luna di april, mei y juni, 2020. FASE, cu ta un compensacion di 950 florin pa personanan cu a perde trabou, por bisa cu 8782 persona a haya e ayudo aki. Sosten Financiero pa Kwartaal ta pa companianan chikito y mediano cu a pidi pa un sosten financiero, cu ta encera un suma di 4 mil florin pa kwartaal.

E programa di mas grandi tabata e Subsidio pa Salario di cual 1647 compania a haci uzo di esaki. Nan por a haya te cu 60% di gasto di salario pa paga 27.180 trahado y tene nan na trabou.

E ultimo programa ta e Qredits di cual 175 compania a haci uzo di e fianza special cu e compañía Microcredito Qredits ta brinda cu aporte di 250.000 florin di Ministerio di Finanza, Economia y Cultura. E ayudo di FASE y pa companianan chikito a wordo saca for di presupuesto di país Aruba. Subsidio di Salario a bini di e prestamo for di Hulanda, ya cu door di lockdown Aruba su ader principal a wordo corta.  

Den tur esaki e entradanan di pais Aruba tambe a baha drasticamente. E surplus di 46 miyon a bira un déficit di 1.3 biyon florin cu mester a busca un forma pa haya. Calculacion haci ta mustra cu Aruba ta bay haya un reduccion di entrada di 50% y mester a reduci su gastonan p ayuda e companianan chikito y e personanan cu a haya ayudo di FASE.  

Pa loke ta e entradanan a calcula cu BAZV lo cay cu 75 miyon den aña 2020. Den april so el a baha cu mas cu 40%.  AZV ta bah acu 22.9%. Paloke ta SVb ta mira caída di 22.5% den luna di april. Normal ta haya 24 miyon florin pa luna di prima. Nan tin reserva pa cubri 3 luna. Probablemente pronto lo mester cuminsa uza e reserva. Impuesto directo y indirecto ta mustra cu den april tabatin caída di 26% y 46% respectivamente.  Impuesto di importacion y accijns ta mira caída di 62.3% den luna di april. Importacion a baha cu 45%, cuminda a baha cu 38% y otro productonan a baha cu 47%. “E cifranan aki ta mustrando e realidad cu e país aki ta den dje,” e mandatario a bisa.