E siman aki riba diahuebs Minister di Finansa a asisti Minister Presidente den e reunion cu Minister Presidentenan di Corsou y Sint Maarten hunto cu Raymond Knops, Secretario di Estado di Hulanda. Aruba y e otro paisnan den Reino lo haya yudansa financiero di Gobierno di Hulanda den forma di fiansa pero mara na condicionnan.
“Aruba te cu awor a sa di cumpli cu mayoria condicion, ma tur cos ta mustra cu condicionnan mas pisa ta na caminda pa cual e union y e boluntad di Pueblo ta bay determina con nos ta sigui dilanti”, asina Minister Xiomara Maduro a anuncia un rato pasa riba su pagina di Facebook.
Aunke cu nos ta sigur cu e mandatario sa di ki condicion nos ta papiando di dje, toch el a opta pa no bay den detaye ainda di nan. Mas bien el a cuminsa tira esaki riba red social pa alerta comunidad cu lo tin mas medida na caminda e siman aki.
Pa dia 3 di juli Hulanda lo anuncia kico ta e condicionnan cu lo mara Aruba na dje pa e fiansa di tempo mas largo. Den esey por spera mas medida, tanto na nivel di operacion di Gobierno como tambe den comercio general, mara na e ayudo di subsidio di salario.
Ta teme cu lo bin un sorto di solidariteitsbelasting pa paga bek tur e placa di FASE y Loonsubsidie, combina cu tur e otro fiansanan pa Gobierno. Pasobra tur hende ta cobrando awo, pero poco ta realisa cu ta placa fia e ta y cu mester paga bek, di un forma of otro!
