Minister Lopez Tromp: Ta via di prensa mi a tende cu ta pidi mi retiro

5533

Minister Marisol Lopez Tromp na su salida a splica cu el a trata di sigui e rueda di prensa di POR, pero esey tabata net na momento cu e tabata den reunion cu Conseho di Minister.
El a bisa cu como Minister ta wordo nombra den e posicion ey y mester duna cuenta na pueblo, pues Parlamento. E organo mas halto ta esun cu ta dicidi riba maneho di Gobierno y Minister. El a bisa cu el a bin ta haci loke Gabinete Wever Croes a stipula pa su maneho.

El a agrega cu e no ta reconoce nada di e acusacionnan cu partido POR a trece dilanti. Pa loke ta Parke Arikok ta nan ta dicidi kende por drenta of sali. P’esey e ta haya straño cu ta acuse di algo si e no ta dicidi.
El a splica tambe den un reunion porta cera, a duna Parlamento informacionnan interno di SERLIMAR cu tecnicamente ta bancarota. Ora e mira cu ta uza esaki como un di e motibonan pa pidi su retiro, e no por bisa cu esaki ta algo corecto. Ta e hunta a dicidi di busca ayudo di Corte pa haya espacio pa hala rosea y trata di cumpli cu nan pagonan.

Minister Marisol Lopez-Tromp a reuni cu Gobernador Alfonso Boekhoudt

Minister Marisol Lopez-Tromp a reuni cu Gobernador Alfonso Boekhoudt

Posted by 24ora on Friday, June 5, 2020

Te e momento cu el a sali di Gobernador, e no a ricibi e carta ainda. El a ripara si cu Minister di Husticia no tabata den reunion di CdM y e mester a sali di e reunion pa scucha kico tabata pasando. Pues ta via di prensa el a haya sa kico tabata pasando.
Pa loke e hecho cu e no tin comunicacion cu partido, el a desmentí esaki totalmente. Si ta berdad el a bisa cu e no tabata presente na un reunion di zoom pasobra un bon campañado di dje di tempo di MEP a fayece, sra. Bea Ras. El a bisa nan cu e no tabata den “mood” pa reunion. Dialuna el a reuni henter dia cu Departamento di DOW riba diferente tema y proyectonan. El a bandona trabou te 8’or di anochi y nan a exigi pa e ta den un reunion di zoom den oranan di atardi hunto cu fraccion.
Minister Marisol Lopez Tromp a splica cu e ta sigui maneho di loke ta e programa di Gobernacion di e coalicion. “Ami no por continua cu un maneho cu ta bayendo atras, mester trata di dreche. E ta mi deber como Minister pa purba haci algo te unda ley ta permiti. No por haci mucho pasobra tin un Board cu ta responsabel.

Pa loke ta personal “mi persona no ta pone ni kita persona den SERLIMAR. Ta responsabilidad pa e director dicidi y ami no ta dun’e ordo di ken pa tuma y ken pa kita.”
E decision pa pidi un Surseance van Betaling, el a bisa cu e ta un tema cu ta regarda e Board tambe. Parlamento a aproba un suma cu mester bay pa SERLIMAR pero nunca e placa aki no a yega cerca e departamento ey. Consecuentemente a purba tur manera pa no haya beslag, y ora cu nan no por a wanta mas, a dicidi pa recuri pa surseance van betaling y a haya aprobacion unanime di e Hunta.
Pa loke ta su retiro, el a bisa cu e no por duna comentario te ora cu e haya e carta y lesa e contenido. Den conferencia di prensa mainta, partido POR a pidi su retiro no mas laat cu dialuna mainta.
Pa finalisa el a bisa cu e agenda di un Minister no ta mescos cu esun di Parlamentario. E ultimonan aki tin mas tempo disponibel. “Di baina mi ta haya chens di bay WC of wak mi cara den spiel,” el a bisa.
E comentarionan aki e mandatario a duna despues di a pasa casi 2 ora den reunion cu Gobernador cual contenido e no kier a bay riba dje.