Minister Lopez: A limita crecemento di camber na 2000 den cinco aña

726

Diamars mainta Minister Marisol Lopez – Tromp conhuntamente cu directornan di departamentonan DIP, DOW y DNM a tene un rueda di prensa na Eagle Beach. Den e rueda di prensa aki a elabora riba e tema di ‘Balansa entre desaroyo y medio ambiente’. E mandatario tabata compaña pa diferente hefe di Departamento directo for di Eagle Beach, un di e atraccionnan mas grandi di Aruba. “E ta un di e beachnan mas bunita na mundo,” Minister Lopez Tromp a comenta.

El a splica cu den e periodo tras di lomba el a tene diferente reunion cu e team di infrastructura, medio ambiente y planificacion riba cual ta proyectonan cu tin permiso cla pa sigui y cual permisonan tin pendiente.

A haci un analisis di cual proyectonan ta esencial y cu por cumpli cu e criterianan pa sigui hiba Aruba dilanti, ta cumpli cu deviezentoets y percura cu unabes nan sigui, ta sigura cu hendenan local ta traha. Den tur esaki ta tene cuenta cu kier stimula economia di Aruba, pero e reto grandi ta pa cuida e medio ambiente di Aruba. Por ehempel den e areanan di naturalesa y e zona hotelero, e ta basta satura caba. E proyectonan cu tin permiso y ta cla pa sigui, lo bay door. Pero a topa cu peticionnan nobo tambe. A evalua tur esakinan. Pero e biaha aki e accento no ta completamente riba stimula economia. “Nos mester pensa pa cuida loke cu nos tin. Hopi area ta satura caba. P’esey a base di e plan ROP, consehonan ricibi, y teniendo cuenta cu naturalesa, a dicidi cu ta restringi extra acomodacionnan cu lo pone un impacto den e areanan. Mas si e ta un impacto cu nos no mester como pais,” e mandatario a bisa. Y a agrega cu ta bay limita e crecemento di cambernan na 2000 durante e proximo cinco añanan.

Balance entre desaroyo y medio ambiente

Posted by 24ora on Tuesday, June 2, 2020

Haime Croes, director di DIP (Departamento di Infrastructura y Planificacion), a splica cu desde aña 86 e crecemento di camber tabata basa pa stimula economia di Aruba. Asina por ehempel enseñansa a keda perhudica, y awo e enfasis mester ta otro. P’esey a pensa pa pone restriccion na e crecemento, y mara esaki na capacidad di vivienda, di salubridad publico, etc.

A base di cifra, raportnan, cu ta bisa kico Aruba por cu ne a tuma un decision. Historia di turismo di Aruba a mustra cu a crece hopi lihe den dies aña cu 3500 camber cu a pone cu e poblacion a crece cu 20 mil persona, cual a pone un presion enorme riba infrastructura di Aruba. Pero awo tin poco luga y mester balansa naturalesa. No por crece mas cu 2000 camber den cinco aña. Nan a haya nan mes confronta cu 8 mil camber cu nan mester a restringi den un periodo di cinco pa dies aña, te na 3400 camber. Pues 2000 pa e prome cinco añanan y e resto pa e siguiente cinco aña. Di e forma aki ta trata di guia e proceso den forma controla. Hasta a tene cuenta cu e cantidad di hendenan cu lo stop di traha.

Awo a haya 3 proyecto cu tabata cla pa cuminsa y no por haci nada pa stop nan, sino lo haya nan mes den Corte. Algun cu tabatin opcion pero no a cumpli, a stopnan y asina a logra yega na e cifra di 3400 camber cu no por haci nada pa para nan y a parti nan riba un periodo controla di dies aña.