Hues a bay di acuerdo awe cu e peticion di e curator nombra pa Corte den Serlimar, esta abogado mr. Geert Rep. El a trece tur compania cu Serlimar debe, pa asina nan bisa Hues si nan ta di acuerdo cu e plan di rescate y cu nan ta dispuesto pa duna e compania un chens pa sobrebibi pa nan por haya maske ta parti di locual debe nan. Mayoria compania a vota na fabor, un solo compania no tabata di acuerdo cu e plan y no kier a duna Serlimar un chens. Hues a cera e tratamento di e caso dunando Serlimar 18 luna mas di rosea, pa por salba e compania.
Abogado mr. Geer Rep a splica awe tardi cu durante tratamento di e caso awe, Hues a scucha tur creditor di Serlimar. Esaki ta un procecura normal, den cual e Hues mes mester scucha di e creditornan si nan ta dispuesto of no pa duna e compania un chens. Si nan bisa cu “no”, nan ta core chens di keda sin haya ningun cen. Si nan bay di acuerdo, e chens ta cu nan lo haya “algo”. E chens pa haya henter nan suma cu Serlimar debe ta masha chikito.
Abogado Rep a splica cu awe Corte a duna aprobacion pa pasa for di Surseance temporal pa esun definitivo. Den esey Corte ta brinda proteccion pa 18 luna mas, den un esfuerso pa yuda e compania sali di su debenan dor di cambia maneho, cobra mas y baha e gastonan. Pa awo e debe di mas grandi na Serlimar ta cu Departamento di Impuesto (DIMP) di 13 miyon florin y tin preferencia. E otro debenan hunto ta cera 8 miyon florin na debe.
Minister Marisol Lopez-Tromp a bisa awe cu e situacion aki a yega despues cu e director di Serlimar a entrega un peticion na Corte pa haya “surseance van betaling”. Hues a atende e caso mesora, pa demostra e urgencia cu tabatin tras di e situacion financiero di e compania. Awe despues di tres luna ya Hues a dicta un sentencia pa duna e compania poco rosea.
E mandatario ta contento cu e decision pasobra e lo alivia hopi asunto importante pa futuro di Serlimar. Asuntonan serio manera aspecto di maneho di desperdicio na Aruba, asunto di dump y Parkietenbos, etc. Recientemente Hues a bishita e Ser’i Teishi unda a constata cu tin mehoracion grandi y cu a limita sino ta caba cu tur molester. Esaki debi cu a cambia e compania cu tabata maneha y dera e bailsnan eynan. Awendia ta hacie mas profesional y a elimina e retonan di holo.
Pa Minister Marisol Lopez-Tromp, e decision aki ta bini como un di dos caso den Corte cu e ta haya rason. Ta por lo menos dos di e motibonan cu partido POR, encabesa pa Otmar Oduber y Andin Bikker, a duna pa core cu ne for di e partido y for di Conseho di Minister. A acusa e mandatario di a actua robes ora a cera Parke Arikok pa vehiculonan ATV/UTV y tambe ora a pidi pa “surseance van betaling” di Serlimar. Den ambos caso Hues a dicta na fabor y a conclui tambe cu den ningun di e casonan e mandatario no tabatin un parti den e decision. Asina mes e decision cu e directiva di e fundacion Parke Nacional y esun cu gerencia a tuma di Serlimr ta corecto! Cu esey e motibonan cu POR a presenta pa purba core cu Marisol Lopez como Minister a cay na awa.
Pa awor e Minister ta spera cu e decision di awe lo yuda e compania pa sigui padilanti y sali di e retonan cu e tabata aden. Lopez-Tromp ta corda cu desde el a asumi e funcion, Serlimar ta un di e trabounan mas pisa cu el a topa cu ne, un compania bancarota y cu yen di reto. Cu e alivio di awe, Serlimar lo por sigui cu su plan di maneho nobo, den cual ta cambia e operacion pa e por ta solvabel.
