Minister Lampe: No ta permiti pa Docentenan den dia traha na Traimerdia tambe

Minister dr. Armando “Rudy” Lampe ta kere cu “Mescos cu ta respeta derecho di esunnan cu ta traha na Traimerdia, mescos mester respeta derecho di e studiantenan tambe, pesey mes den futuro ta spera cu tur stakeholder na Aruba tuma na cuenta cu muchanan cu ta bin pa ricibi guia lo no por wordo laga un banda”.

Minister Armando Rudy Lampe ta kere cu e les cu nos tur a siña di dje na e momentonan aki ta cu nos mester keda enfoca  riba e derecho di mucha, pasobra e mucha ta central. Sinembargo Mnister  Lampe ta compronde cu cambionan, aunke con chickito e por ta, ta crea intrankilidad.

Un di e cambionan cu a trece padilanti ta pa esunnan cu ya caba ta maestro di scol durante full e parti di mainta y despues merdia, cu nan mester prepara nan lesnan y kijk na lesnan pa e siguienta dia, pero cu tur esaki riba dje  tin acerca Traimerdia banda di su trabao di 8 ora den dia, esaki por trece consecuencia, pesey mes Minister Armando Rudy Lampe kier proteha nos maestronan.

Berdad cu Aruba tin scarsedad di maestra y maestro y esunnan cu tin, Gobierno no ta desea di overbelast nan y tampoco pa nan neglisha nan trabao dor di cansancio. Loke cu ta un realidad ta, cu e trabao di un maestra of maestro dia pa dia ta mas dificil y ta un cansancio mental.

A tuma e decision pa maestronan cu ya caba tin un full time job di 8 ora den enseñansa, cu no ta humano pa bolbe duna nan un tarea mas den Traimerdia. Pa e motibo aki mes a stop e parti aki pa proteha e maestro pa asina nan por enfoca y duna les parti mainta unda cu e studiante den dia ta haya e atencion necesario.

Esaki ta un di e cambionan chikito cu a keda implementa y cu ta creando cierto insiguridad cerca esunnan cu ta trahando den Traimerdia. Ta importante pa keda motiva nos muchanan pa sigui e bunita trabao di maestra debi cu hopi di nos docentenan ta bahando cu pensioen y ta causa cu Aruba ta tin mester di hopi maestra  y maestro pa yena e vacaturanan.

Si esunnan cu ta den Traimerdia kier crece pa drenta e trayecto di Enseñansa ta keda cupo pa e studiantenan cu ta studiando pa asistente di maestro drenta Traimerdia. No ta na Aruba so pero na Hulanda y otro paisnan a haci diferente investigacion cuanto un docente por keda duna les. Na momento cu un maestro ta overwerkt e no ta funciona optimal y e por yega na e extremo di perde control di e situacion y esey ta netamente loke cu kier evita.

Mester tin siguridad pa e muchanan cu ta den Enseñansa den dia y tambe siguridad pa e muchanan di Traimerdia. Esaki ta rekeri tambe cu un maestra y maestro ta den balans cu su mes. Banda di tur esaki mayoria maestro y maestro tin un famia y tambe tin nan propio yiu cu mester di nan atencion tambe.