E Crisis Team kluster 4 a anuncia cu scolnan lo habri dia 20 di augustus y door di e situacion actual, no por bay bek na pasado. P’esey nan a anuncia reglanan cu mester cumpli cu e protocol di Directie Volksgezondheid Aruba (DVG).
Minister di Enseñansa, Ciencia, Desaroyo Sostenibel Armando Rudy Lampe, ta pidi e scolnan cu ta habri nan porta dia 20 di augustus pa cumpli estrictamente cu e reglanan di DVG. E protocol di DVG ta señala cu si mayornan dicidi cu nan yiu no ta bay scol pa cualkier motibo, esey tambe ta posibel. Tambe si maestronan ta sinti di ta den e grupo di risico, nan mester bisa e cabesante di scol y desde cas por cumpli cu nan trabou. Esey ta e realidad nobo cu ta biba cu ne, esta home schooling y home office.
Bureau Leerplicht conoce e mandatario su maneho, unda cu e muchanan tin derecho di educacion pero por ricibi esaki tambe pafo di scol y no mester ta necesariamente presente eynan. Door di e situacion di normal nobo, mas mayor ta opta pa les online. A declara aña 2020 e aña di innovacion y educacion, p’esey ta ofrece e posibilidad pa mayornan scoge enseñansa online.
Segun e mandatario, nan a habri posibilidad cu e muchanan por sigui completamente nan enseñansa primario online. Tambe e muchanan por haci nan enseñansa secundario online y haya un diploma di American High School. Esnan cu ta interesa por manda un email na [email protected]. Eynan lo ofrece esnan cu ta scoge p’e sistema Hulandes, henter e programa di tur loke por siña. E hobennan di voorzet onderwijs por sigui online te yega eind examen na MAVO, HAVO of VWO.
Lo ofrece guia na hobennan cu tin pregunta na Biblioteca Nacional di Aruba. Cu guia lo ofrece landsexamen completamente online. Ta introduci pa tur cu kier haal nan diploma di MAVO, HAVO of VWO, e posibilidad aki online. Esnan interesa por yama na 5283400 y puntra p’e departamento di landsexamen pa haya tur informacion. Asina aki e studiante por scoge pa no bay middag MAVO of avond MAVO, pero e sistema tradicional lo keda vigente.
