Minister di Enseñansa Rudy Lampe den oranan di atardi tabatin un reunion cu docentenan di Emma School relaciona cu cambionan cu kier introduci den enseñansa special.
E mandatario na final a declara cu e cambionan aki ta drenta na vigor na inicio di e proximo aña escolar unda ta uni dos scol: Emma School y Un Paso pa Futuro. Pues nan dos lo ta bou di e mesun dak na Ayo.
Den cuadro di esaki e mandatario a sigura cu ni maestro- ni studiantenan lo wordo perhudica cu e cambio. Esey mi ta duna nan garantia, e mandatario a bisa.
E union di e dos scolnan aki ta debi na tratadonan internacional, pero por a constata tambe cu e cantidad di muchanan pa scolnan special a baha drasticamente. Pero mas cu esey, Tratadonan internacional cu ta enfatisa cu tur pais cu a firma Tratado mester tin enseñansa inclusivo. Tur mucha mester haya e mesun enseñansa, y e unico motibo pa separa muchanan for di enseñansa ta pa motibonan medico.
P’esey na tur scol di 4 pa 8 aña a pone cu mester duna enseñansa na Papiamento y no mester bay Emma School pa haya e educacion di e forma aki.
E mandatario a splica cu e reunion a dura largo pasobra el a contesta preguntanan cu a bini dilanti y duna un miho splicacion posibel tras di e plan y pakico di e cambionan. Ta bay tin un scol publico cu ta na Ayo mientras cu na Brasil tin uno catolico.
Cambio semper ta trece cierto intrankilidad, y esey ta e motibo cu a acudi na Emma School pa duna trankilidad.
Pa logra cu tur plan ta cla pa augustus, mester traha pa mehora e facilidad pa e muchanan por haya les den un bon ambiente. “Nos tin cu pone e recursonan disponibel pa e muchanan special tambe haya les den un bon luga.”
E dosnan hunto bou di un solo dak ta bay haya School Soeur Juliette.