Minister Jesus-Leito huntu ku Outoridat di Aviashon Sivil di Kòrsou (CCAA) a lansa e website nobo pa e organisashon, esta www.ccaa.cw. Riba e website aki, tur interesado por risibí informashon ekstenso di tur e diferente servisionan ku e organisashon ta ofresé.
E website ta na ingles mirando ku e sektor di aviashon ta komuniká primariamente na ingles. Tin informashon di regulashonnan, legislashon, formularionan, Akuerdonan di Servisio Aéreo (“Air Service Agreements”) lisensia, i hopi mas. Outoridat di Aviashon Sivil di Kòrsou (CCAA) ta e organisashon di Gobièrnu ku ta sòru pa struktura i kordinashon di e kuadronan den kual por práktika aviashon na un manera sigur. E organisashon aki ta supervisá entre otro e sevisionan di tráfiko aéreo, e aeropuerto, , pilotonan, mekánikonan i e aerolineanan. CCAA ta supervisá pues tur asuntu ku tin di haber ku seguridat di aviashon pa Kòrsou.
Na e manera aki Ministerio di Trafiko, Transporte i Planifikashon Urbano ta i lo keda kontribui na konsientisashon i edukashon pa lo ke ta trata e tareanan ku Minister Jesus-Leito ta karga responsabilidat pe. Minister Jesus-Leito ta satisfecho ku e logro aki pa e organisashon i ta invitá tur hende pa bishitá e website.
