Minister Guillfred Besaril lo traha riba miho entendimento cu e studiantenan

Durante e conferencia di prensa cu presencia di minister Guilfred Besaril a puntre mesora riba e asunto di seguro di studiante. Tin keho cu a cuminsa lanta cabes. Kico e lo haci como minister? Lo traha riba miho entendimento cu e studiantenan. Lo atende cu e seguro nobo of si lo sigui cu e seguro actual. Kier pa nan tin un miho seguro posibel pa e hobennan haya miho servicio posibel.

E mandatario a splica cu e ta deliberando hunto cu su colega di Enseñansa, dr. Lampe, unda cu a tuma e decision cu lo continua pa un grupo di studiante cu e seguro actual, pa motibo cu tabata tin tres luna prome cu e seguro caduca pa tuma e decision si ta sigui cu e seguro si of no. Sino bo ta haya den default pa loke ta trata e aspecto huridico di e seguro. Tres luna prome tabata apenas den eleccion y no tabata sigur si tabata tin un continuacion di e gobierno anterior of lo tin un gobierno nobo. Pa ora cu a asumi e responsabilidad na November, tabata practicamente laat pa stop cu e seguro den su forma actual.

Besaril a cuminsa haci e acuerdonan necesario pa sinta cu esnan cu ta maneha e seguro, treciendo e dolor padilanti pa mira cu tin un miho entendimento pa loke ta nos hobennan na Hulanda. Loke ta e minister di enseñansa na Aruba, lo cuminsa cu e tramitenan necesario pa asina aki mira pa bin un seguro nobo, si ta continua cu e mesun compania, ta bin un otro compania. Tur esaki ta bay wordo gestiona den e proximo lunanan pa asina si tin un seguro nobo, pa cuminsa cu ta bay Hulanda, Juli padilanti, te ora cu por pasa tur e hobennan cu ta na Hulanda, riba un seguro nobo of por lo menos nan ricibi un servicio cu ta mas adecuado cu esun actual. A reconoce e problema y a tuma accion riba dje.

Tin cierto cosnan cu a bisa cu tin cu investiga den otro pa sa precies pa por mehora e servicio. Pesey ta bay sinta cu nan. A compronde cu tin di haber cu e seguro no ta aparece riba tur e banconan di informacion cu tin na Hulanda. E ta aparece cerca dokternan di cas, pero no cerca e dentistanan, e no ta aparece cerca cierto specialistanan. Ta cosnan cu tin cu investiga si esey ta e caso. Den caso cu e ta asina ey, con lihe por mehora e aspecto eynan. Na momento cu bo pasa bo pasje y cu bo no ta aparece den e sistema, por bisa cu por duna servicio, pero tin cu paga.

Esey ta tipo di cosnan cu e minister ta bisa cu e por paga, pero e hoben cu ta conta riba su cen, cada euro cu e tin na e momento ey, bise bay paga, algo delanta cu no a premira, bo ta bay hink’e den un problema financiero. Esey ta loke nos hobennan ta pasando den dje. Pesey mes tin e contactonan necesario pa sinta resolve e problemanan aki, mientras cu e servicio ta uno cu ta wordo renoba anualmente. E ora ey por haci e ehercisio necesario pa mira si ta e mesun compania, of ta otro companianan ta bin na turno pa ofrece servicio y ta den ki forma e lo sosode. Esey ta hunto cu colega minister Lampe.