Minister Glenbert a enfoca tocante e importancia di derechonan di mucha y a accentua e gratitud cu e tin pa cada un, como tambe pa nos docente- y cabesantenan di scol, cu ademas di ta docente ta un partner importante den siguridad di nos criaturanan. E mandatario a percura pa den su agenda di diahuebs, anticipando dia di mucha, pa e pasa bishita scolnan y topa cu muchanan di Aruba.
Minister di Asunto Social y Labor, Glenbert Croes, acompaña pa Rochi Geerman y Stephanie Croes, a bishita Sint Michaël School na San Nicolas, Colegio San Hose na Santa Cruz y Pastoor Kranwinkel na Paradera, Faith Revival School na Rooi Afo, Butterfly Day Care, Curason Contento Peuterschool, De Schatkist Peuterschool y finalmente Kinderhuis Imeldahof na Noord. Muchanan a ricibi un atencion for di e mandatario den forma di un ‘bookmark’ y un appel pa conmemora e dia.
E ‘bookmark’ y e appel: E appel ta un simbolo conoci universalmente como un simbolo cu ta representa educacion. E appel cu e muchanan a ricibi, ta representa educacion cu enfoke special riba e importancia di Dia Internacional di Derecho di Mucha. Adicionalmente e appel ta simbolicamente representa salud: Un appel pa dia ta tene bo riba pia.
Texto riba e bookmark cu mas di 700 mucha a ricibi diahuebs ultimo for di e mandatario ta bisa textualmente: “Como mucha mi tin derecho di crece y purba logra loke cu mi kier. Durante mi aventura di bida mi ta siña e diferencia entre bon y malo , pa despues mi uza mi experiencia pa forma ken mi kier ta”. Esey ta e mensahe cu e mandatario a laga atras pa nos muchanan cu e speransa cu e gesto chikito aki por tin un impacto positivo den nan bida.
Adicionalmente, tur aña mundo ta conmemora Dia Internacional di Mucha cu e adopcion di e declaracion universal di e derechonan di mucha di aña 1959. Aruba tambe a firma e tratado aki na aña 2001. Den e tratado di derechonan di mucha di “United Nations”, tin palabracionan describi con paisnan mester anda cu mucha- y hobenan. Tambe kico tur nan tin derecho ariba dje.
Pa mas informacion tocante derechonan di mucha bishita: http://derechodimucha.org/mi-derecho. Ta keda na cada un di nos pa respeta y fortalece derecho di nos criaturanan. Feliz dia di Mucha
