Principio di RAIZ ta inclusion y derecho igual pa tur hende. Segun minister Geoffrey Wever, pa loke ta matrimonio di mesun sexo, tur ta para riba e mesun liña, tanto lider di e partido, minister Ursell Arends, como e dos parlamentarionan y tambe minister Wever.
Durante noticiero Enfoke, e mandatario a indica cu nan ta kere den igualdad, ta kere cu e manera con nos leynan ta hinca den otro, ta discriminatorio. E vonnis di hof a bisa esey tambe, e mandatario a indica, cu e leynan ta discriminatorio y mester duna oportunidad igual na tur persona cu ta biba na Aruba.
N’e mes momento si analisa e veredicto di hof, hof a bay un tiki leu den e sentido cu por bisa cu ta un decision cu ta di wetgever y no di hues. Pero esey ta un punto principal. E discusion cu ta andando cu si ta para pa matrimonio igual, RAIZ ta parti di su principionan y esey ta nan pensamento. Aworaki gobierno, hunto cu e parlamentarionan ta fihando nan posicion como pais.
Tin un deadline pa bay den casacion, pero tin suficiente tempo ainda y ta haciendo esaki na un forma hopi responsabel, pasobra tin cu tene na cuenta cu interes di tur hende. Tur hende tin un opinion riba esaki, tin hende cu ta mas extremo, tin hende cu ta menos. Y tin cu tene tur hende den consideracion.
Pa ora cu e decision ta comunica eyfo, e tin tin dragvlak y hende ta compronde pakico a tuma cierto decision. E no ta kita afo con RAIZ ta wak esaki. No mester lubida cu parlamentario Misha Raymond a firma un ley di iniciativa di parlamentario Miguel Mansur di partido Accion 21, pa duna contenido.
Pa mas detaye lesa TREMPAN.
