Minister Dr. Rudy Lampe: T’ami ta manda den enseñansa!

Relaciona cu e carta firma pa Minister Presidente mr. Evelyn Wever-Croes na sindicato SIMAR den cual ta repasa algun decision tuma den enseñansa, awe Minister dr. Rudy Lampe a aclaria cu e carta ey tabata un “comunicacion” y no un “decision”. Minister Lampe a sigura cu t’e ta e autoridad den enseñansa y ta su decision ta conta. El a subraya cu Minister Presidente ta “Team Leader” di e gabinete, pero t’e ta responsabel pa maneho di enseñansa na Aruba.

E ultimo dianan aki e sindicato cu ta representa docentenan na Aruba, esta SIMAR, ta sigui demostra nan malcontento pa e forma con deliberadamente ta haci afspraak cu Minister Lampe y e no ta tene su mes na nan. Pio ainda, awo nan ta bay mas ariba y ta haya compromiso di Minister Presidente “preto riba blanco” y ainda e Minister di Enseñansa ta sali bisa cu ta un “eror humano” e prome mandatario a haci dor di skirbi algo cu no ta asina.

Minister Dr. Rudy Lampe na SIMAR: T'ami ta manda den enseñansa. E ta referi na e carta cu Minister Presidente a manda pa e sindicato. E ta considera e carta como un comunicacion y no un decision!

Minister Dr. Rudy Lampe na SIMAR: T'ami ta manda den enseñansa. E ta referi na e carta cu Minister Presidente a manda pa e sindicato. E ta considera e carta como un comunicacion y no un decision!

Posted by 24ora on Monday, July 6, 2020

Awe el a accentua cu cada Minister ta personalmente responsabel pa su cartera y ningun otro no por mete den dje. Por lo menos no si ta ateniendo nan mes na e acuerdo di gobernacion entre e tres partidonan MEP, POR y RED. Y el a confirma durante su ultimo reunion di Parlamento cu e ta ateniendo su mes cabalmente na e acuerdo. Es mas, mayoria di e cambionan cu e ta haciendo awor aki tabata den programa di gobernacion di MEP, pero cu a bay den e acuerdo di gobernacion y awo e ta cumpliendo cu tur. Pues e tampoco no ta compronde tin biaha dicon ta haci comosifuera cu no sa di e maneho of decisionnan cu e ta tuma den nomber di MEP mes!