Minister di Salud Publico na Hulanda, Bruno J. Bruins di 57 aña di edad a tuma su retiro awe for di Gabinete Rutte III di Gobierno di Hulanda representando partido VVD. E ta den posicion desde 26 di october 2017.
Kico ta motibo di su retiro no ta conoci. Pero ayera el a hera cay flauw durante un debate riba Coronavirus den Parlamento na Hulanda. A nota cu Parlamentarionan tabata cuestiona su maneho masha pisa, di kier permiti pa contagia e pais cu Coronavirus pa por crea un sistema imuun y asina eradica e virus. No ta tur Parlamentario ta na fabor di e pensamento aki y ta puntra e Minister si tur hende cu fayece lo keda riba su consenshi.
Ta pendiente mas den dia pa sa e motibo real dicon e mandatario a opta pa “benta serbete den ring” awe y bandona su funcion y asina tambe su responsabilidad na cabes di e trabounan pa cura e pais di Coronavirus.
