Minister di Hustisia ta lansa kampaña, Sendé? Gosa … sigur!

SETAR 3GB Free Data den February
i10 Sedan
PPG Super Descuento
RBC Mortgage Switch Campaign 2019

AGO Montaña tabata esenario pa lansamentu di e kampaña Sendé?! Gosa…Sigur!. Un kampaña spesial dirigí riba hóbennan di entre 12-24 aña ku e meta pa konsientisá riba e temanan droga, alkohòl i seksualidat.

Fabulous Carnival
Cambia, Spaar y Gana

E lansamentu di e kampaña awe djaluna 4 di febrüari, a kana pareu ku e apertura di e Siman di Prevenshon di AGO Montaña, kaminda bou di ora di skol diferente instansia ta duna informashon riba e tema di alkohòl i droga, seksualidat i salú.

Minister di Hustisia Quincy Girigorie i Ministerio di Hustisia a skohe AGO Montaña komo un skol modelo pa loke ta trata e skol su enfoke riba prevenshon, mirando ku e ministerio a deklará aña 2019 komo Aña di Prevenshon. Komo akto simbóliko pa habri e Siman di Prevenshon i alabes lansa e kampaña Sendé?! Gosa…Sigur!, Minister Quincy Girigorie, a hasi regalo di bukinan spesial pa hóbennan pa studiantenan di AGO Montaña.

E kampaña Sendé?! Gosa…Sigur! ta un koperashon entre diferente organisashon den e kadena hudisial manera Ministerio di Hustisia, Ministerio Públiko, Kuerpo Polisial Kòrsou (KPC), AJJC (Ambulante Justitiële Jeugdzorg Curaçao), Voogdijraad i Reclassering. Pa loke ta trata KPC, polisnan di bario (‘buurtreggisseur’) i polisnan ku ta enkargá ku trabounan di hóben, tambe lo duna nan kontribushon den e tim. Ademas e organisashon Yave a djòin e tim di ekspertonan i trahadónan sosial den Hustisia, pa duna informashon na hóbennan riba e temanan aki. Huntu ku e tim di Hustisia i Yave, lo tei tambe e programa Biba Amor di GGD. Pues, Ministerio di Salú, Medio Ambiente i Naturalesa tambe ta kolaborá ku e kampaña Sendé?! Gosa…Sigur!.

Medio sosial i skolnan


E kampaña ku tin komo meta pa di forma konhunto, influensiá hóbennan di tal forma ku krímen bou di hóben ta baha, ta konsistí di dos trayekto. Di un banda lo kuminsá denter di poko ku un kampaña di konsientisashon riba medionan sosial. Aki lo hasi uso di entre otro video i otro tipo di material di komunikashon pa papia ku hóbennan riba e temanan di e kampaña i habri espasio pa hóbennan tambe pensa i dialogá riba uso di droga i alkohòl i sèks iresponsabel. Un i tur por sigui e kampaña aki riba e página di Facebook di entre otro Ministerio di Hustisia, Prevenshon Seguridat i Abo i páginanan di e organisashonnan ku ta forma parti di e tim. Huntu ku e kampaña riba medionan sosial, un tim konsistiendo di e organisashonnan ariba menshoná lo drenta skolnan sekundario – ku hóbennan den e grupo di enfoke ta bishitá – i duna informashon i guia na hóbennan. E tim aki lo kombersá ku e hóbennan riba e temanan enkuestion, durante seshonnan di 45 minüt di un forma fásil i simpel, sin imponé pero ku enfoke riba mustra e konsekuensianan di kada akshon.

Duna informashon i guia

Durante di e seshonnan aki lo bai mas amplio riba temanan manera uso di alkohòl bou di menornan i benta di alkohòl ku menornan, uso ilegal i iresponsabel di alkohòl i droga, tiramentu di droga den bebida, kombinashon di alkohòl ku por hiba na konsekuensianan fatal, rèspèt pa kurpa di otro i e límitenan ku un persona pone pa ku seksualidat, preshon di grupo i e importansia di mèldu i hasi denunsia ora un persona ta víktima òf testigu di un akto kontra lei. Ounke e foko di e kampaña ta riba hóbennan, tambe lo pone atenshon na e echo ku mayornan i komersiantenan ta ofresé òf bende alkohòl na menor di edat. Den e tim ku ta bishitá skolnan tin profeshonalnan ku hopi aña di eksperensia den duna informashon i guia na tur tipo di hóben riba temanan aki.
Minister di Hustisia, tin e deseo pa e tim di Gosa Sigur, bishitá mas tantu skol posibel, pero mirando e kantidat di tempu disponibel pa ku e kampaña spesífiko aki, esta di 4 di febrüari pa 5 di mart, a skohe pa dal bai ku 15 skol. Den e eskoho di skolnan sekundario a enfoká entre otro riba skolnan ku ta partisipá na Parada di Tiner i a skohe skolnan tambe a base di e área, direktiva di skol i tipo di skol. Den e kaso di e último faktor aki, a skohe pa bishitá skolnan AGO, VSBO, SBO i HAVO/VWO. AGO Montaña komo e skol kaminda a lansa e kampaña lo haña seshonnan di informashon durante henter e siman di 4 pa 8 di febrüari.

”Sendé? Gosa … sigur!”

E kampaña di konsientisashon, ta karga e título Sendé? Gosa … sigur!. E ’slogan’ aki ta pa enfatisá ku maske e hóben ta kla pa disfrutá e ambiente karnavalesko, e ta hasi eskohonan ku no tin konsekuensianan negativo p’e. E no ta keda sin gosa, pero e ta gosa ’safe’, ku lo ménos riesgo posibel. Porsierto Ministerio di Hustisia, ta lansa e kampaña aki den temporada di Karnaval, komo ku ta un temporada di hopi fiesta i aktividatnan públiko na kua hóbennan ta partisipá pero e intenshon tei pa sigui ku e kampaña durante di aña 2019.

Comments

comments

Island Finance – Carnaval