Despues di a firma e Plan Sosial mará na e Functieboek 2009 di Sentro di Detenshon i Korekshon Kòrsou (SDKK) huntu ku sindikatonan ABVO, SAP i STrAF na ougùstùs último, awor Minister di Hustisia señor Quincy Girigorie a hasi e ’kick off’ di e implementashon di Functieboek 2009. Djaluna 30 di òktober último durante di un reunion na SDKK, tur e miembronan di e komishonnan embolbí ku e implementashon a sera konosí i a palabrá e proseduranan general di trabou. Durante di e seshon Minister di Hustisia señor Girigorie a instalá un ‘implementatie manager’ i a instituí kada komishon.
Implementashon di e reorganisashon na SDKK lo ta na enkargo di kuater komishon ku lo guia i sostené e proseso. Ta trata aki di ‘plaatsingscommissie’, ‘selectiecommissie’, ‘bezwarencommissie’ i ‘afrondingscommissie’. Kada komishon ta enkabesá pa un presidente. E ‘plaatsingscommissie’ i e ‘selectiecommisie’ ta presidí pa señor Herbert Copra. E ‘bezwarencommisie ta presidí pa señor Erwin Martina i e ‘afrondingscommissie’ ta presidí pa señora Magna Copra. E komishonnan ta konsistí di representantenan di e diferente sindikatonan, di personal Ministerio di Hustisia i di Ministerio di Maneho di Gobernashon, Planifikashon i Servisio Públiko i di SDKK.
Komishonnan E ‘plaatsingscommissie’ tin komo tarea pa konsehá enkuantu e alokashon di e personal den e organisashon i pa pèrkurá ku e alokashon di e personal ta kana optimal. E komishon tin di sòru pa e alokashon tuma lugá di tal forma ku e ta benefisioso tantu pa e empleado komo pa e organisashon. E ‘selectiecommmissie’ ta enkargá entre otro ku hasi proposishon na direktor di SDKK enkuantu kriterionan i proseduranan di reklutamentu i selekshon di personal. Tambe e komishon ta enkargá ku e selekshon final di kandidatonan ku lo yena funshonnan nobo i funshonnan klave. E ‘bezwarencommissie’ lo atendé i duna konseho riba kasonan di opheshon ku keda entregá. Finalmente e ‘afrondingscommissie’ lo konsehá minister riba temanan riba kua ainda partidonan no a yega na un konsenso. E komishon lo inventarisá e temanan aki i formulá un plan kon pa atendé ku nan.
‘Implementatiemanager’ Pa e trayekto por ta eksitoso, minister a apuntá un asina yamá ‘implementatiemanager’. E funshon di ‘implementatiemanager’ aki lo ta na enkargo di señora Gimena van der Gen, ‘sector directeur’ na Ministerio di Hustisia. Señora van der Gen tin e tarea pa guia i trèk e implementashon di e Functieboek 2009. E ‘implementatiemanager’ lo tin komunikashon kontinuo ku e presidente di kada komishon i ku direktor di SDKK. Di e forma aki e ta funshoná komo un ‘schakel’ entre e proseso i e Minister di Hustisia. E ‘implementatiemanager’ tin e enkargo aki pa un periodo di seis luna i e ta haña sosten di un tim di Ministerio di Hustisia.
Satisfakshon Tantu Minister Girigorie komo señor Floran, direktor di SDKK, a ekspresá nan sentimentu di satisfakshon pa ku e ‘kick off’ di e trayekto aki. Pa señor Girigorie, e implementashon aki ta un komienso ku lo kontribuí na su maneho di resosialisashon. Ademas señor Floran a splika ku despues di a hasi hopi esfuerso pa influensiá e kultura den prizòn di forma positivo i di a pèrkurá pa empleadonan haña formashon, e implementashon di e Functieboek 2009 lo duna mas forma na e mehorashon di e organisashon.
Plan Sosial Den e Plan Sosial ta deskribí regla i palabrashon en kuantu e proseso di reorganisashon di SDKK, na kua partidonan ta bai tene nan mes. Entre otro ta regla e posishon hurídiko di e trahadónan manera e personal di seguridat, wardadónan di prezu i otro empleadonan públiko ku ta forma parti di e instituto penitensiario aki. Den e Functieboek 2009 a deskribí tur e funshonnan eksistente i e funshonnan nobo. Pareu ku e implementashon di e functieboek 2009 e ‘implementatiemanager’ huntu ku e direktor di SDKK lo enkaminá e trayekto di revishon ku ta enserá 13 funshon nobo, nesesario pa optimalisá e reorganisashon ya asina e organisashon por kumpli ku reglanan internashonal. Den e konvenio ku a sera relashoná ku e Plan Sosial, a regla entre otro ku lo no tin retironan obligatorio na SDKK komo konsekuensia di e reorganisashon.
