Aruba su sistema hudicial ta un sistema imparcial segun Minister di Husticia mr. Andin Bikker. E mandatario a referi na e investigacion cu ta tumando luga riba aparatonan cu a disparce for di bestuurskantoor.
Segun Minister Bikker, ora cu entrega un keho, e sistema hudicial ta independiente y ta canalisa e investigacionnan manera cu ta haya cu ta necesario y riba nan responsabilidad. Durante conferencia di gobierno dialuna mainta, e mandatario a bisa di ta
lamenta cu cierto gritonan cu ta bisa cu tin persecucion politico. Esaki absolutamente no ta e caso. Hecho ta, cu ora gobierno a asumi su responsabilidad, a bin ta bisa for di varios siman, cu a bin topa cu un bestuurskantoor cu no tin e propiedadnan di pais Aruba caminda cu nan
mester ta. Minister Bikker ta sigui bisa, cu esey ta pone cu e propio mandatarionan cu mester a percura pa tin un traspaso ordena, a causa cu e gobierno nobo mester a canalisa e procesonan cu ta cai bou di e gobierno aki su responsabilidad pa haya e propiedadnan di pais Aruba bek. Los di esey, no por ta asina, cu trahadonan publico cu tabatin caso contra nan cu por a bay cu un printer of kibra documentonan di gobierno, nan a wordo procesa y bai corte
pa defende nan mes.
Awor cu tin un gobierno saliente cu no a percura pa salvaguardia e propiedad di pais Aruba na un manera ordena, cu diripiente un persona yega na nan, ta wordo cuestiona riba esaki cu diripiente ta bin cu e defensa cu no, ta persecucion politico. Segun Minister mr. Andin Bikker, e ta lamenta esaki, pasobra Aruba tin un sistema integro hudicial cu cada persona ta independiente pa nan sistema di hiba investigacion. Tin landsverordening politie cu ta dilenea exactamente kico ta responsabilidad di cada actor den e
keten hudicial. Tanto e gobierno aki como su persona como minister di husticia no tin ningun autoridad pa bai mete den caso individual. E mandatario di husticia ta bisa cu e no a yega di hacie y lo no bai hacie tampoco. Ta di lamenta cu ta crea un impresion cu tin un persecucion politico y absolutamente no ta berdad. Bestuurskantoor a ser haya desampara unda diferente artefacto y aparatonan a disparce y como mandatarionan nobo, e tin responsabilidad pa purba haya bek e propiedadnan di pueblo di bestuurskantoor di pais Aruba.
