Minister di Husticia diasabra atardi a yama un reunion urgente pa trata e tema di asilo politico. Representante di varios departamento cu tin di haber cu e tema aki a reuni hunto cu Minister Bikker na Bestuurkantoor pa asina discuti kico ta e proximo pasonan cu lo bay tuma relaciona cu e ultimo desaroyo, caminda cu Huez Comisario a dicidi cu tin pa laga un grupo di Venezolano indocumenta den libertad si nan aplica pa asilo a base di Tratado.
E personanan aki tabata esunnan cu Guarda Nos Costa a detene riba e rif dilanti CITGO diahuebs mainta. Nan tur a ser hiba pa Guarda Nos Costa pendiente di nan deportacion, pero a opta pa pidi asilo politico a base di Tratado. Pa Minister Bikker e dicision di Huez tabata uno sorprendente pero no a keda nada otro pa respeta e decision di Huez. Ja e unidad di asiel ta bezig ta tratando cada peticion pa por yega na un desishon riba e aplicacionan pa asilo. Varios biaha ta resulta cu e peticion pa asilo no tin base y ta wordo haci pa purba alarga estadia.
Mientras cu e situacion na Venezuela ta keda tenso, islanan den Reino ta keda den un situacion fastioso unda personanan ta keda bandona Venezuela y trata na yega Aruba y Corsow via boto. Minister Bikker hunto cu departamentonan concerni ta bezig ta atende e situacion cu a presenta cu pasonan firme. Dialuna Minister Bikker lo ta den conferencia di prensa unda e lo bay duna mas informacion di e maneho pa adresa e situacion cu a presenta.
